අමෙරිකානු ජනාධිපති ඩොනල්ඩ් ට්රම්ප් විසින් ඉරානයට එරෙහිව දියත් කර ඇති හමුදා ක්රියාමාර්ගය හමුවේ ඔහුගේ දැඩි මතධාරී ආධාරකරුවන් පිරිසක් ඔහුට එරෙහිව කැරලි ගසමින් සිටිති. “America First” (ප්රථමයෙන් අමෙරිකාව) යන ප්රතිපත්තිය යටතේ ට්රම්ප් වටා රොක් වූ MAGA ව්යාපාරයේ ප්රබලයන් වන නික් ෆියුඑන්ටිස් (Nick Fuentes) සහ ප්රකට මාධ්යවේදී ටකර් කාල්සන් (Tucker Carlson) මෙම ප්රහාරයන් “පිළිකුල් සහගත සහ දුෂ්ට” ක්රියාවන් ලෙස හඳුන්වා දී ඇත.
විශේෂයෙන්ම 27 හැවිරිදි දේශපාලන ක්රියාකාරී නික් ෆියුඑන්ටිස් සිය අනුගාමිකයන්ගෙන් ඉල්ලා සිටින්නේ ට්රම්ප් සහ රිපබ්ලිකන් පක්ෂය අතහැර දමා ඉදිරි අතුරු මැතිවරණයේදී ඩිමොක්රටික් පක්ෂයට ඡන්දය ලබා දෙන ලෙසයි. “යම් දෙයක් දරුණු ලෙස වැරදී ඇත. ට්රම්ප්, මාර්කෝ රූබියෝ සහ ජේ.ඩී. වැන්ස් අපව පාවා දී තිබේ,” යනුවෙන් ඔහු සිය ‘රම්බල්’ (Rumble) සජීවී විකාශයකදී ප්රකාශ කළේය. මෙම පරිපාලනය වහාම නතර කළ යුතු බව පවසන ඔහු, මෙය ඉශ්රායලය වෙනුවෙන් අමෙරිකානුවන් බිලි දෙන යුද්ධයක් බවට චෝදනා කරයි.
ප්රකට රූපවාහිනී නිවේදිකා මෙගන් කෙලී (Megyn Kelly) ද මෙම ප්රහාර හමුවේ සිය විරෝධය පළ කරමින් පවසා සිටියේ කිසිදු අමෙරිකානු සෙබළෙකු විදේශීය රටක් වෙනුවෙන් මිය නොයා යුතු බවයි. කෙසේ වෙතත්, මෙම විවේචන හමුවේ නොසැලී සිටින ජනාධිපති ට්රම්ප් පවසන්නේ MAGA යනු තමන් මිස මෙම පුද්ගලයන් නොවන බවයි. රටේ ආරක්ෂාව වෙනුවෙන් මෙම “මාර්ගය” තෝරා ගැනීමට සිදු වූ බව ඔහු අවධාරණය කරයි.
පසුගිය පෙබරවාරි 28 වැනිදා එල්ල වූ මහා පරිමාණ ගුවන් ප්රහාරයකින් ඉරාන උත්තරීතර නායක අලි කමේනි ඝාතනය වීමත් සමඟ වසර 70කට අධික කාලයක් පවතින අමෙරිකා-ඉරාන ගැටුම නවතම සහ භයානකම මාවතකට අවතීර්ණ වී ඇත. 1953 වසරේ සිට මේ දක්වා පැවති සම්බාධක, තානාපති සබඳතා බිඳවැටීම් සහ න්යෂ්ටික ගිවිසුම් පිළිබඳ ඉතිහාසය දෙස බලන විට, වත්මන් යුදමය වාතාවරණය කලාපීය ස්ථාවරත්වයට එල්ල වී ඇති බරපතලම තර්ජනය බව දේශපාලන විශ්ලේෂකයෝ පෙන්වා දෙති.
