ජපන් භාෂා පුහුණු මධ්යස්ථානයක් මුවාවෙන් පවත්වාගෙන යමින්, ජපානයේ ඉදිකිරීම්, හෝටල් සහ රියදුරු රැකියා ලබාදෙන බව පවසා පුද්ගලයන් මුළා කළ වංචනික විදේශ රැකියා ආයතනයක් ශ්රී ලංකා විදේශ සේවා නියුක්ති කාර්යාංශයේ විශේෂ විමර්ශන ඒකකය විසින් වටලා තිබේ. කුරුණෑගල, මහව, දළදාගම හන්දියේ පවත්වාගෙන ගිය මෙම ස්ථානය වැටලීමට පියවර ගෙන ඇත්තේ රුපියල් 750,000ක මුදලක් ලබාගෙන පොරොන්දු වූ පරිදි රැකියාව ලබා නොදුන් බවට ලද පැමිණිල්ලක් විමර්ශනය කිරීමෙන් අනතුරුවය. උපායදූතයෙකු යොදා ගනිමින් සිදුකළ මෙම මෙහෙයුමේදී අනාවරණය වී ඇත්තේ මෙම ආයතනය මගින් සුදුසුකම් නොමැති පුද්ගලයන් වෙනුවෙන් ව්යාජ විශ්ව විද්යාල උපාධි සහතික සහ සේවා සහතික කූට ලෙස සකස් කරන බවයි.
මෙම වැටලීමේදී අදාළ ආයතනය පවත්වාගෙන ගිය අඹුසැමි යුවළක් අත්අඩංගුවට ගෙන ඇති අතර, එහි තිබී ව්යාජ සහතිකවල ආකෘති ඇතුළත් ලැප්ටොප් පරිගණක, ගිවිසුම් පත්ර සහ මුදල් කුවිතාන්සි රැසක් ද නිලධාරීන් භාරයට ගෙන තිබේ. සැකකාර යුවළ මහව මහේස්ත්රාත් අධිකරණය වෙත ඉදිරිපත් කිරීමෙන් පසු වරද පිළිගැනීම හේතුවෙන් දැඩි ඇප කොන්දේසි මත නිදහස් කර ඇති අතර ඔවුන්ට විදේශ ගමන් තහනමක් ද පනවා ඇත. විදේශ රැකියා සඳහා යොමුවීමේදී බලපත්රලාභී නියෝජිතායතන හරහා පමණක් කටයුතු කරන ලෙසත්, කිසිදු පෞද්ගලික ගිණුමකට මුදල් තැන්පත් නොකරන ලෙසත් විදේශ සේවා නියුක්ති කාර්යාංශය මහජනතාවගෙන් නැවතත් ඉල්ලා සිටියි.
