සංවිධානාත්මක අපරාධකරුවෙකු ලෙස සැලකෙන “කෙහෙල්බද්දර පද්මේ” විසින් මෙහෙයවන ලද අපරාධ ජාලයට ආධාර අනුබල දීමේ චෝදනාව මත අත්අඩංගුවට ගෙන සිටින උප පොලිස් පරීක්ෂකවරයෙකු ලබන 16 වනදා දක්වා යළි රක්ෂිත බන්ධනාගාරගත කිරීමට කොළඹ ප්රධාන මහේස්ත්රාත් අසංග එස්. බෝදරගම මහතා අද (05) නියෝග කළේය.
මෙලෙස රක්ෂිත බන්ධනාගාරගත කරනු ලැබුවේ ගම්පහ විශේෂ විමර්ශන ඒකකයේ සේවය කළ බෙන්තොට කම්කම්ලාගේ නිරෝෂන් උදිත උදේශාන් නමැති උප පොලිස් පරීක්ෂකවරයායි.
අපරාධ පරීක්ෂණ දෙපාර්තමේන්තුව (CID) විසින් මෙම සිද්ධිය සම්බන්ධයෙන් සිදුකරන විමර්ශනවල ප්රගතිය ඇතුළත් වාර්තාවක් අද දින අධිකරණයට ඉදිරිපත් කරන ලදී. එහිදී කරුණු දැක්වූ නිලධාරීන් පෙන්වා දුන්නේ මෙම අපරාධ ජාලය සම්බන්ධයෙන් තවදුරටත් පුළුල් විමර්ශන සිදු කිරීමට අවශ්ය බැවින් සැකකරු තවදුරටත් රඳවා තබා ගන්නා ලෙසයි. එම කරුණු සලකා බැලූ මහේස්ත්රාත්වරයා සැකකරු ලබන 16 දක්වා යළි බන්ධනාගාරගත කිරීමට නියෝග කළේය.
සංවිධානාත්මක අපරාධකරුවන් සමඟ සබඳතා පවත්වන දූෂිත නිලධාරීන් හඳුනාගෙන ඔවුන්ට එරෙහිව දැඩිව නීතිය ක්රියාත්මක කිරීමට ආරක්ෂක අංශ මේ වන විට විශේෂ මෙහෙයුම් දියත් කර තිබේ.
