වසර දහස් ගණනකට පෙර වඳ වී ගොස් ඇතැයි විද්යාඥයන් නිගමනය කර තිබූ කුඩා පොසම් (Possum) විශේෂයක් සහ ග්ලයිඩර් (Glider) විශේෂයක් ඉන්දුනීසියාවේ බටහිර පැපුවා හි හුදෙකලා වැසි වනාන්තරයකින් යළි සොයාගෙන තිබේ. මෙය ලොව අතිශය දුර්ලභ ගණයේ විද්යාත්මක සොයාගැනීමක් ලෙස සැලකෙන අතර, සිකුරාදා ප්රකාශයට පත් කළ ඕස්ට්රේලියානු කෞතුකාගාර වාර්තා සඟරාව මඟින් මේ බව තහවුරු කර ඇත. එක් අතක අසාමාන්ය ලෙස දිගු ඇඟිල්ලක් සහිත ‘පිග්මි’ (Pygmy) පොසම් සත්වයා සහ අතු අල්ලා ගැනීමට හැකි වලිගයක් සහිත ග්ලයිඩර් සත්වයා මෙලෙස වසර 6,000කට පසු ප්රථම වතාවට සජීවීව දැකගැනීමට විද්යාඥයන් සමත්ව තිබේ.
මියගොස් නැවත පණ ලැබූ බයිබල් චරිතයක් ඇසුරින්, වඳ වී ගොස් යැයි සැලකෙන සත්වයෙකු යළි හමුවීම විද්යාවේදී “Lazarus taxon” ලෙස හඳුන්වන අතර, ප්රමුඛ ඕස්ට්රේලියානු විද්යාඥ ටිම් ෆ්ලැනරි පවසන්නේ මෙවැනි සත්ව විශේෂ දෙකක් එකවර හමුවීම සැබවින්ම විස්මිත සිදුවීමක් බවයි. ගෝලීය කාලගුණ විපර්යාස සහ වන විනාශය හමුවේ වුවද ස්වභාවධර්මයේ මෙවැනි සැඟවුණු රහස් අනාවරණය වීම පරිසරවේදීන්ගේ දැඩි උනන්දුවට හේතු වී තිබේ. මෙම සතුන් ජීවත් වන ඉතා දුරස්ථ පරිසර පද්ධති ආරක්ෂා කිරීමේ වැදගත්කම විද්යාඥයන් දැන් අවධාරණය කර සිටිති.
