ශ්රී ලංකා ආර්ථික විද්යාඥයින්ගේ සංගමයේ සභාපති, සම්මානිත මහාචාර්ය පූජ්ය විජිතපුරේ විමලරතන හිමියන් අද (06) විශේෂ ප්රකාශයක් කරමින් ජනාධිපතිවරයාගේ මානුෂීය මැදිහත්වීම ඇගයීමට ලක් කළහ. මෑතකදී අනතුරට පත් ඉරාන නෞකාවක සිටි පිරිස බේරාගැනීම සඳහා ශ්රී ලංකා නාවික හමුදාව මෙහෙයවීමට ජනාධිපතිවරයා ගත් තීරණය, හුදෙක් මානුෂීය මෙහෙයුමකට එහා ගිය මූලෝපායික වැදගත්කමකින් යුක්ත බව උන්වහන්සේ පෙන්වා දුන්හ.
විශේෂයෙන්ම හෝමූස් සමුද්ර සන්ධියේ පවතින අර්බුදකාරී වාතාවරණය සහ මැදපෙරදිග කලාපයේ යුදමය තත්ත්වය හමුවේ මෙවැනි පියවරක් ගැනීම හරහා ශ්රී ලංකාව ජාත්යන්තරය හමුවේ වගකීම් සහගත රාජ්යයක් ලෙස ඉස්මතු වන බව මහාචාර්ය හිමියන්ගේ අදහසයි. “ලෝක වෙළඳපොළේ තෙල් මිල ඉහළ යමින් පවතින සහ නාවික ගමනාගමනය අඩාල වී ඇති මොහොතක, මෙවැනි මිත්රශීලී සබඳතා පවත්වා ගැනීම දිගුකාලීන ආර්ථික ස්ථාවරත්වයට මෙන්ම මෙරටට අවශ්ය බලශක්ති සුරක්ෂිතතාව තහවුරු කර ගැනීමට ද මහඟු පිටුවහලක් වන බව” උන්වහන්සේ අවධාරණය කළහ.
මෙම මානුෂීය මෙහෙයුම හරහා මැදපෙරදිග කලාපයේ රටවල් සමඟ පවතින රාජ්ය තාන්ත්රික සබඳතා තවදුරටත් වර්ධනය වන බවත්, එය අනාගතයේදී මෙරට ආර්ථිකයට සෘජු ආයෝජන සහ වෙළඳ සහයෝගීතාවන් ලබා ගැනීමට මාවත විවර කරන බවත් උන්වහන්සේ වැඩිදුරටත් සඳහන් කළහ. ලෝක බලවතුන් අතර ගැටුම් පවතින අවස්ථාවක ශ්රී ලංකාව මෙලෙස ස්වාධීන හා මානුෂීය ප්රතිපත්තියක් අනුගමනය කිරීම ජනාධිපතිවරයාගේ දුරදක්නා නුවණ පිළිඹිබු කරන්නක් බව ද උන්වහන්සේ පැවසූහ.
මෙරට ආර්ථික විද්යාඥයින් පෙන්වා දෙන්නේ මෙවැනි රාජ්ය තාන්ත්රික ජයග්රහණ හරහා ජාත්යන්තර මූල්ය වෙළඳපොළ තුළ ශ්රී ලංකාව කෙරෙහි පවතින විශ්වාසය තවදුරටත් තහවුරු වන බවයි. බත්තරමුල්ලේ සීලරතන හිමියන් වැනි පාර්ශවයන් ද රජයේ ආරක්ෂක පිළිවෙත අගය කළ පසුබිමක, උගතුන් සහ බුද්ධිමතුන් ද මෙලෙස රජයේ ජාත්යන්තර මැදිහත්වීම් පිළිබඳව සුබවාදී අදහස් පළ කිරීම විශේෂත්වයකි.
