දශක පහකට ආසන්න කාලයක් මෙරට බලශක්ති ක්ෂේත්රයේ ඒකාධිකාරිය හෙබවූ ලංකා විදුලිබල මණ්ඩලය (CEB) ඊයේ මධ්යම රාත්රියෙන් නිල වශයෙන් අහෝසි විය. රජය විසින් ක්රියාත්මක කරන රාජ්ය ආයතන ප්රතිව්යුහගතකරණ වැඩපිළිවෙළ යටතේ, මණ්ඩලය සතු වගකීම් සහ මෙහෙයුම් කටයුතු ස්වාධීන සමාගම් 06ක් වෙත පැවරීම අද සිට බලාත්මක කර තිබේ.
1969 වසරේදී ස්ථාපිත කළ ලංකා විදුලිබල මණ්ඩලය මෙතෙක් සිදුකළ විදුලි උත්පාදනය, සම්ප්රේෂණය සහ බෙදාහැරීම යන සියලු කාර්යයන් මෙම නව සමාගම් ව්යුහය යටතේ වඩාත් විධිමත් ලෙස සිදුකිරීම රජයේ අපේක්ෂාවයි. ජාත්යන්තර මූල්ය අරමුදලේ (IMF) නිර්දේශ ද සැලකිල්ලට ගනිමින් 2024 අංක 36 දරන ශ්රී ලංකා විදුලිබල පනත මගින් මෙම ඓතිහාසික වෙනස සිදුකර ඇත.
නව ව්යුහය යටතේ ස්ථාපිත කර ඇති සමාගම් සහ ඒවායේ වගකීම් මෙසේය:
ඉලෙක්ට්රිසිටි ජෙනරේෂන් ලංකා පුද්ගලික සමාගම (Electricity Generation Lanka Pvt Ltd): විදුලි උත්පාදන කටයුතු භාරව ක්රියා කරයි. මෙහි ප්රධාන විධායක නිලධාරියා ලෙස සාලිය පණ්ඩිතරත්න මහතා පත් කර තිබේ.
නැෂනල් ට්රාන්ස්මිෂන් නෙට්වර්ක් සර්විස් ප්රොවයිඩර් පුද්ගලික සමාගම (National Transmission Network Service Provider Pvt Ltd): විදුලිය සම්ප්රේෂණය කිරීමේ වගකීම දැරේ. මෙහි ප්රධාන විධායක නිලධාරියා ලෙස ඉංජිනේරු එන්.එස්. වෙත්තසිංහ මහතා පත් කර ඇත.
ඉලෙක්ට්රිසිටි ඩිස්ට්රිබියුෂන් ලංකා පුද්ගලික සමාගම (Electricity Distribution Lanka Pvt Ltd): පාරිභෝගිකයින් වෙත විදුලිය බෙදාහැරීමේ කටයුතු මෙහෙයවනු ලබයි. මෙහි ප්රධාන විධායක නිලධාරියා ලෙස ඉංජිනේරු කේ.එස්.අයි. කුමාර මහතා පත් කර තිබේ.
මීට අමතරව නැෂනල් සිස්ටම් ඔපරේටර් (National System Operator), සී.ඊ.බී. එම්ප්ලෝයිස් ෆන්ඩ් (CEB Employees’ Fund) සහ එනර්ජි වෙන්චර්ස් ලංකා (Energy Ventures Lanka) යනුවෙන් තවත් සමාගම් 03ක් ස්ථාපිත කර ඇති අතර ඒවායේ පත්වීම් ඉදිරියේදී සිදුවීමට නියමිතය.
මෙම ව්යුහාත්මක වෙනස සිදු වුවද, විදුලිය බිඳවැටීම් හෝ නව සම්බන්ධතා වැනි සේවාවන්හි කිසිදු වෙනසක් සිදු නොවන බව බලධාරීන් අවධාරණය කරයි. අදාළ සමාගම් විසින් ඉදිරියේදී නව සේවා ක්රමවේදයක් හඳුන්වා දෙන තෙක් පාරිභෝගිකයින්ට පවතින ක්රමවේදය යටතේම සිය අවශ්යතා සපුරා ගත හැකිය.
