2026 වසරේ විදුලි ජනනය සඳහා අවශ්ය ගල්අඟුරු සැපයීමට ගිවිසුම්ගත වූ ඉන්දියානු සමාගම, මේ වන විට සිය සැපයුම් අත්හිටුවීමේ අවදානමක් මතුව ඇති බව පෙරටුගාමී සමාජවාදී පක්ෂයේ අධ්යාපන ලේකම් පුබුදු ජයගොඩ මහතා පවසයි. ඊයේ (08) කොළඹ පැවැති විරෝධතාවයක් අතරතුර මාධ්ය අමතමින් ඔහු සඳහන් කළේ, ගෙවීගිය දින 10ක කාලය තුළ එකදු ගල්අඟුරු නැවක් හෝ දිවයිනට පැමිණ නොමැති බවයි.
ට්රයිඩන්ට් චෙම්ෆර් (Trident Chemfar) නමැති අදාළ ඉන්දියානු සමාගම මෙට්රික් ටොන් එකක ප්රවාහන ගාස්තුව ඩොලර් 15කට පොරොන්දු වී තිබුණද, මැදපෙරදිග පවතින යුදමය වාතාවරණය හේතුවෙන් නැව් ගාස්තු තවත් ඩොලර් 11කින් පමණ ඉහළ ගොස් ඇත. මේ හේතුවෙන් ලාභය අඩුවීම මත සමාගම සැපයුමෙන් ඉවත් වීමට සැරසෙන්නේ දැයි සැකයක් මතුවන බව ජයගොඩ මහතා පෙන්වා දෙයි. එළඹෙන අප්රේල් මස අගදී වාරකන් සමය ආරම්භ වීමත් සමඟ පුත්තලම වෙරළට නැව් ළඟා වීමට නොහැකි වන බැවින්, මෙරට බලශක්ති ක්ෂේත්රය බරපතළ අර්බුදයකට මුහුණ දී ඇති බව ඔහු වැඩිදුරටත් අවධාරණය කළේය.
