ඉරානය සමඟ ආරම්භ වූ යුද ගැටුම්වල පළමු දින හය ඇතුළත පමණක් ඇමෙරිකානු රජයට අවම වශයෙන් ඇමෙරිකානු ඩොලර් බිලියන 11කට අධික මුදලක් වැය වී ඇති බව පෙන්ටගනය කොංග්රස් මණ්ඩලයට දැනුම් දී තිබේ. ආරක්ෂක විසර්ජන උප කමිටුවේ ඉහළම ප්රජාතන්ත්රවාදී සාමාජිකයෙකු වන සෙනෙට් සභික ක්රිස් කූන්ස් (Chris Coons) ප්රකාශ කළේ, මූලික ඇස්තමේන්තුවලට අනුව මෙම පිරිවැය ඩොලර් බිලියන 11.3ක් පමණ වන බවයි. මෙහි වඩාත්ම කැපී පෙනෙන කරුණ වන්නේ යුද්ධයේ පළමු දින දෙක තුළ පමණක් ඇමෙරිකානු හමුදාව ඩොලර් බිලියන 5කට අධික වටිනාකමකින් යුතු පතොරම් සහ අවි ආයුධ භාවිත කර තිබීමයි.
මෙම අධික පිරිවැය පිළිබඳ වාර්තා පළ වෙද්දී, ඇමෙරිකානු ජනාධිපති ඩොනල්ඩ් ට්රම්ප් බදාදා (11) කෙන්ටකි හි පැවති රැලියකදී ප්රකාශ කළේ තමන් දැනටමත් ඉරාන යුද්ධය “ජයග්රහණය කර” ඇති බවයි. “පළමු පැය ඇතුළතම එය අවසන් වුණා, අපි දිනුවා” යනුවෙන් ඔහු සඳහන් කළද, යුද්ධය අවසන් වූ බවට පවතින සාක්ෂි මොනවාදැයි ඔහු පැහැදිලි කළේ නැත. යුද්ධයේ කාලසීමාව පිළිබඳව ජනාධිපතිවරයා මීට පෙර පරස්පර ප්රකාශ නිකුත් කර තිබූ අතර, ඇතැම් විට මෙය සති හතරක් හෝ හයක් ගතවනු ඇති බවත්, තවත් විටෙක මෙය “කෙටි සංචාරයක්” (Short excursion) වැනි බවත් පවසා තිබුණි.
මෙම යුද මෙහෙයුම සඳහා “එපික් ෆියුරි” (Operation Epic Fury) යන නම තැබූ ආකාරය පිළිබඳව ද ජනාධිපතිවරයා මෙහිදී රසවත් තොරතුරක් අනාවරණය කළේය. බලධාරීන් විසින් නම් 20ක් පමණ තමන්ට යෝජනා කළ නමුත් ඒවාට තමන් ප්රිය නොකළ බවත්, පසුව “Epic Fury” යන නම දුටු සැනින් එය තෝරාගත් බවත් ඔහු සඳහන් කළේය. කෙසේ වෙතත්, දින කිහිපයක් ඇතුළත මෙතරම් දැවැන්ත ධනස්කන්ධයක් වැය වීම සම්බන්ධයෙන් ඇමෙරිකානු දේශපාලන ක්ෂේත්රය තුළ දැඩි කතාබහක් නිර්මාණය වී තිබේ.
