දිවයිනේ විවිධ ප්රදේශවලින් වාර්තා වන සොරකම් කිරීම් පිළිබඳ පැමිණිලි සැලකිල්ලට ගනිමින්, නිවෙස්වල සේවය සඳහා පුද්ගලයන් බඳවා ගැනීමේදී වඩාත් සුපරීක්ෂාකාරී වන ලෙස පොලිස් මාධ්ය කොට්ඨාසය මහජනතාවට විශේෂ උපදේශනයක් නිකුත් කර තිබේ. නිවෙස්වල සේවය කළ පුද්ගලයන් රන් ආභරණ, මුදල්, විදේශ විනිමය සහ වෙනත් වටිනා දේපළ සොරකම් කළ බවට මෑතකදී පැමිණිලි රැසක් ලැබී ඇති බව පොලිසිය පවසයි. විමර්ශනවලදී අනාවරණය වී ඇත්තේ ඇතැම් පුද්ගලයන් විවිධ ඒජන්සි, තැරැව්කරුවන් මාර්ගයෙන් හෝ සෘජුවම සේවයට එක්වී පසුව මෙලෙස සොරකම් සිදුකර පලායන බවයි.
මෙවැනි අපරාධ වළක්වා ගැනීම සඳහා සේවකයන් බඳවා ගැනීමට පෙර ඔවුන්ගේ ජාතික හැඳුනුම්පත් පරීක්ෂා කිරීම, පොලිස් වාර්තාවක් ලබා ගැනීම සහ ඔවුන්ගේ පවුලේ සාමාජිකයන්ගේ තොරතුරු වාර්තා කර තබා ගැනීම අනිවාර්ය බව පොලිසිය අවධාරණය කරයි. එමෙන්ම, රන් ආභරණ, මුදල් සහ වැදගත් ලේඛන ආරක්ෂිතව තැබීමට පියවර ගන්නා ලෙසත්, හැකි සෑම විටම සේවකයන් නිවසේ තනි කර යාමෙන් වළකින ලෙසත් නිවැසියන්ට උපදෙස් දී තිබේ. මීට අමතරව, නව සේවකයෙකු බඳවා ගත් වහාම ඒ පිළිබඳව ප්රදේශයේ පොලිස් ස්ථානය දැනුවත් කිරීම වඩාත් සුදුසු බව ද බලධාරීන් වැඩිදුරටත් පෙන්වා දෙයි.
