මැදපෙරදිග කලාපයේ පවතින උග්ර යුදමය තත්ත්වය හේතුවෙන් සීඝ්රයෙන් ඉහළ යන තෙල් මිල සහ අඩාල වී ඇති ජාත්යන්තර වෙළඳාම හමුවේ අග්නිදිග ආසියානු රටවල ආර්ථිකයන්ට දැඩි බලපෑම් එල්ල වෙමින් පවතින බව ආසියාන් (ASEAN) සංවිධානයේ විදේශ සහ ආර්ථික අමාත්යවරුන් පෙන්වා දෙති. මැනිලා නුවරදී පැවැති විශේෂ හමුවකදී එම සංවිධානයේ නායකයන් අවධාරණය කළේ, කලාපීය සහ ගෝලීය ස්ථාවරත්වය වෙනුවෙන් මෙම ගැටුම් වහාම නතර කළ යුතු බවත්, සියලු පාර්ශ්වයන් උපරිම ස්වයං පාලනයකින් යුතුව කටයුතු කළ යුතු බවත්ය.
මෙම අර්බුදය හමුවේ මැලේසියාව, තායිලන්තය සහ වියට්නාමය ඇතුළු ආසියාන් සාමාජික රටවල් සිය බලශක්ති පරිභෝජනය සීමා කිරීමටත්, දේශීය වෙළඳපොළ ස්ථාවරව පවත්වා ගැනීමටත් දැනටමත් විවිධ පියවර ගනිමින් සිටී. විශේෂයෙන්ම සංචාරක කර්මාන්තය වැනි සංවේදී ක්ෂේත්ර ආරක්ෂා කර ගැනීමට රජයන් කඩිනම් ක්රියාමාර්ග ගෙන ඇති බවත්, ගෝලීය බලශක්ති සැපයුම් දාමයන් අඛණ්ඩව පවත්වාගෙන යාම අත්යවශ්ය බවත් මෙහිදී අවධාරණය කෙරිණි.
ඉරාන ගැටුම තවදුරටත් උග්ර වීමත් සමඟ පැන නැගී ඇති ආර්ථික පසුබෑම අවම කර ගැනීම සඳහා කලාපීය යාන්ත්රණයන් සක්රීය කිරීමට මෙහිදී තීරණය වී තිබේ. පිලිපීනයේ සභාපතිත්වයෙන් පැවැති මෙම සාකච්ඡාවේදී විදේශ ලේකම් තෙරේසා ලාසාරෝ ප්රකාශ කළේ, මැදපෙරදිග පවතින තත්ත්වය අග්නිදිග ආසියානු කලාපයේ ආරක්ෂාවට සහ ආර්ථිකයට සෘජු තර්ජනයක් වී ඇති බැවින් සාමකාමී විසඳුමකට එළඹීම කාලීන අවශ්යතාවක් බවයි.
