අමෙරිකානු ජනාධිපති ඩොනල්ඩ් ට්රම්ප් සහ චීන ජනාධිපති ෂී ජින්පින් අතර පැවැත්වීමට නියමිතව තිබූ තීරණාත්මක රාජ්ය තාන්ත්රික හමුව කල් දැමීමේ සූදානමක් පවතින බව වාර්තා වේ. හෝමූස් සමුද්ර සන්ධිය සුරක්ෂිත කිරීමේ මෙහෙයුම් සඳහා බෙයිජිං පාලනය සහය නොදක්වන්නේ නම්, මෙම සංචාරය ප්රමාද කරන බවට ට්රම්ප් කළ ප්රකාශයත් සමඟ මෙම නවතම දේශපාලන උණුසුම නිර්මාණය වී තිබේ.
අද (2026 මාර්තු 16) පෙරවරුවේ පැවැති මාධ්ය හමුවකදී චීන විදේශ අමාත්යාංශ ප්රකාශක ලින් ජියාන් (Lin Jian) මහතා මේ සම්බන්ධයෙන් සිය ප්රතිචාරය පළ කළේය. චීන-අමෙරිකානු සබඳතා තුළ රාජ්ය නායක මට්ටමේ සන්නිවේදනය අත්යවශ්ය මඟපෙන්වීමක් සිදු කරන බවත්, මාර්තු 31 සිට අප්රේල් 2 දක්වා නියමිතව තිබූ ට්රම්ප්ගේ සංචාරය පිළිබඳව දෙරට අතර අඛණ්ඩව සන්නිවේදනය පවත්වාගෙන යන බවත් ඔහු එහිදී ප්රකාශ කර ඇත.
හෝමූස් සමුද්ර සන්ධියේ නාවික ගමනාගමනය සුරක්ෂිත කිරීම සඳහා චීනය, බ්රිතාන්යය සහ ප්රංශය වැනි රටවල් යුද නැව් එවිය යුතු බවට අමෙරිකානු ජනාධිපතිවරයා කළ ඉල්ලීම සම්බන්ධයෙන් ද චීන ප්රකාශකයා සිය ස්ථාවරය පැහැදිලි කළේය. පවතින නොසන්සුන්කාරී වාතාවරණය හේතුවෙන් ගෝලීය වෙළඳ මාර්ග අඩාල වී ඇති බවත්, එය ලෝක සාමයට දැඩි තර්ජනයක් වී ඇති බවත් ඔහු පෙන්වා දුන්නේය.
ගැටුම් පවතින කලාපයේ සියලු යුදමය ක්රියාමාර්ග වහාම අත්හිටුවන ලෙස චීනය නැවත වරක් සියලු පාර්ශවයන්ගෙන් ඉල්ලා සිටින බවත්, පවතින යුද තත්ත්වය සමනය කිරීමට (De-escalation) චීනය කැපවී සිටින බවත් ලින් ජියාන් මහතා වැඩිදුරටත් අවධාරණය කළේය. මෙම රාජ්ය තාන්ත්රික අර්බුදය හමුවේ ලෝක බලවතුන් අතර පවතින සම්බන්ධතාවය ඉදිරියේදී කිනම් මාවතකට යොමු වනු ඇතිද යන්න පිළිබඳව ජාත්යන්තර දේශපාලන විශ්ලේෂකයෝ දැඩි අවධානයෙන් පසුවෙති.
