ඇමරිකාව, ඊශ්රායලය සහ ඉරානය සෘජුව සම්බන්ධ වී ඇති මැදපෙරදිග යුදමය තත්ත්වය සති දෙකක් පසු කරද්දී, ලෝක වෙළඳපොළේ බොරතෙල් මිල ඉහළ යාම හේතුවෙන් රටවල් රැසක් දැඩි අර්බුදයකට මුහුණ දී සිටී. පසුගිය මාර්තු 9 වනදා වන විට බොරතෙල් බැරලයක මිල ඩොලර් 119 සීමාවට පැමිණි අතර මේ හේතුවෙන් බොහෝ රටවල් සිය ඉන්ධන මිල ඉහළ නැංවීමට සහ සැපයුම සීමා කිරීමට පියවර ගෙන ඇත. ඒ අනුව කාම්බෝජය 68%කින් ද, වියට්නාමය 50%කින් ද, නයිජීරියාව 35%කින් ද, කැනඩාව 28%කින් ද සිය ඉන්ධන මිල ඉහළ දමා ඇති අතර ශ්රී ලංකාව මිල ඉහළ දමා ඇත්තේ අනෙකුත් රටවලට සාපේක්ෂව අවම අගයක් වන 8%කිනි.
කලාපීය වශයෙන් බලන කල ඉන්දියාව හෝටල් සහ අවන්හල් සඳහා ලබා දෙන ගෑස් ප්රමාණය 20%කින් සීමා කර ඇති අතර පිලිපීනය රජයේ කාර්යාල කටයුතු දින 4කට සීමා කර තිබේ. දකුණු කොරියාව වසර 30කට පසු ප්රථම වරට ඉන්ධන සඳහා උපරිම සිල්ලර මිලක් නියම කර ඇති අතර බංග්ලාදේශය ඉන්ධන පෝලිම් පාලනයට සලාක ක්රමයක් හඳුන්වා දී විදුලි පිරිවැය අවම කිරීමට විශ්වවිද්යාල තාවකාලිකව වසා දමා ඇත. ජපානය ද සිය තෙල් සංචිත මුදා හැරීමට සූදානම් වන ලෙස උපදෙස් දී ඇති අතර වියට්නාමයේ ඇතැම් නගරවල ඉන්ධන සැපයුම අඩාල වී ඇති බව විදෙස් වාර්තා පෙන්වා දෙයි.
ශ්රී ලංකාව තුළ පවතින තත්ත්වය කළමනාකරණය කර ගැනීමට QR ක්රමවේදය යටතේ වාහන කාණ්ඩ අනුව ඉන්ධන නිකුත් කිරීම ආරම්භ කර ඇත. යුද්ධය ආරම්භ වී දින 9ක් තුළ සාමාන්යයෙන් මාස එකහමාරකට ප්රමාණවත් ඉන්ධන තොගයක් ජනතාවගේ අධික ඉල්ලුම හේතුවෙන් නිකුත් කිරීමට සිදුවූ බව ඛනිජ තෙල් නීතිගත සංස්ථාව පවසයි. මෙය ඩොලර් අර්බුදයක් නොව ගෝලීය සැපයුම් ජාලයේ පවතින බාධාවක් බැවින් ඉන්ධන පිරිමැස්මෙන් භාවිත කරන ලෙස බලධාරීන් ජනතාවගෙන් ඉල්ලා සිටී.
