මැදපෙරදිග කලාපයේ පවතින ඉරාන යුද්ධය හේතුවෙන් චීන ජනාධිපති ෂී ජින්පින් සහ ඇමරිකානු ජනාධිපති ඩොනල්ඩ් ට්රම්ප් අතර පැවැත්වීමට නියමිතව තිබූ තීරණාත්මක හමුව මාසයකින් පමණ කල් දැමීමට ඇමරිකාව තීරණය කර තිබේ. මාර්තු 31 සිට අප්රේල් 2 දක්වා චීනයේදී පැවැත්වීමට නියමිතව තිබූ මෙම සාකච්ඡාව කල් දැමීමට හේතුව ලෙස ජනාධිපති ට්රම්ප් පෙන්වා දෙන්නේ, යුදමය තත්ත්වය සමීපව අධීක්ෂණය කිරීම සඳහා තමන් වොෂින්ටනයේ රැඳී සිටීම අත්යවශ්ය බවයි. ගෝලීය තෙල් සැපයුමට එල්ල වී ඇති බාධා සහ ඇමරිකාව තුළ ඉන්ධන මිල ඉහළ යාමේ තර්ජනය හමුවේ මෙම තීරණය ගෙන ඇති අතර, මෙය වෙළඳ ගැටලු හෝ වෙනත් කරුණක් මත ගත් තීරණයක් නොවන බව ඇමරිකානු භාණ්ඩාගාර ලේකම් ස්කොට් බෙස්න්ට් ද තහවුරු කර ඇත.
කෙසේ වෙතත්, හෝමුස් සමුද්ර සන්ධියේ පවතින අවහිරතා ඉවත් කිරීමට චීනය සහාය නොදක්වන්නේ නම් මෙම හමුව කල් දැමිය හැකි බවට ජනාධිපති ට්රම්ප් මීට පෙර ඉඟි කර තිබූ අතර, ඉරාන බලශක්ති අපනයනවල ප්රධාන ගැනුම්කරුවෙකු වන චීනය ඇමරිකාව සහ ඊශ්රායලය ඉරානයට එල්ල කරන ප්රහාර විවේචනය කිරීම නිසා දෙරට අතර යම් නොසන්සුන්තාවක් ද නිර්මාණය වී තිබේ. මේ අතර, ඇමරිකානු සහ චීන නියෝජිතයන් පසුගියදා පැරිසියේදී හමුවී ආර්ථික සම්බාධක සහ තීරුබදු පිළිබඳ සාකච්ඡා පවත්වා ඇති අතර, එහිදී ඇතැම් කරුණු සම්බන්ධයෙන් එකඟතාවයකට පැමිණ ඇති බව ද වාර්තා වේ.
