ලොව ජනප්රියතම සිතියම් මෘදුකාංගය වන Google Maps, Gemini කෘත්රිම බුද්ධි (AI) තාක්ෂණය මුසු කරමින් වඩාත් දියුණු සහ පහසු විශේෂාංග දෙකක් හඳුන්වා දී තිබේ. ‘Ask Maps’ සහ ‘Immersive Navigation’ ලෙස නම් කර ඇති මෙම නව මෙවලම් හරහා රියදුරන්ට වඩාත් සජීවී සහ සංවාදශීලී අත්දැකීමක් ලබා දීමට Google සමාගම පියවර ගෙන ඇත. මෙහි ඇති Ask Maps විශේෂාංගය මගින් රියදුරන්ට සිතියම සමඟ සෘජුවම සංවාදයේ යෙදිය හැකි අතර, ගමන් මාර්ගයේ ඇති රථවාහන නැවැත්වීමේ ස්ථාන, වැසිකිළි පහසුකම් හෝ විවේක ගැනීමට සුදුසු ස්ථාන පිළිබඳව ඕනෑම සංකීර්ණ ප්රශ්නයක් විමසා ක්ෂණික පිළිතුරු ලබාගත හැකිය. මෙය දැනට අමෙරිකාවේ සහ ඉන්දියාවේ Android සහ iOS පරිශීලකයන් සඳහා නිකුත් කර තිබේ.
දශකයකට පමණ පසු Google Maps වෙත එක් වූ විශාලතම වෙනස ලෙස සැලකෙන Immersive Navigation විශේෂාංගය මගින් ගමන් මාර්ගයේ ඇති ගොඩනැගිලි, ගුවන් පාලම් සහ භූමියේ ස්වභාවය ඉතා පැහැදිලි ත්රිමාණ (3D) දර්ශනයක් ලෙස දැකගත හැකිය. මීට අමතරව පදික මාරු, මංතීරු, නවත්වන සංඥා සහ රථවාහන ආලෝක සංඥා පවා සිතියම මත විචිත්රව දිස්වන බැවින් නුපුරුදු මාර්ගවල පවා රියදුරන්ට ඉතා විශ්වාසයෙන් යුතුව රිය පැදවීමේ හැකියාව ලැබේ. Gemini AI මාදිලිය භාවිතා කරමින් මංසන්ධි සහ බාධක පිළිබඳව ගැඹුරු අවබෝධයක් ලබා දීම මෙහි ප්රධාන අරමුණයි.
මසකට බිලියන දෙකකට අධික පරිශීලකයන් සංඛ්යාවක් භාවිතා කරන Google Maps, මෙම නව යාවත්කාලීන කිරීම් හරහා තවදුරටත් සිය ආධිපත්යය තහවුරු කර ගැනීමට සූදානම් වෙයි. රිය පැදවීමේදී වෙනත් පර්යේෂණ සිදුකිරීමට අවශ්ය නොවී, අවශ්ය සියලු තොරතුරු සිතියම තුළින්ම ලබා දීම මගින් ගමනාන්තය කරා යන ගමන වඩාත් ප්රශස්ත කිරීමට මෙමගින් අවස්ථාව ලැබේ. මැදපෙරදිග අර්බුදය හමුවේ ඉන්ධන පිරිමැසීමට සහ ගමන් මාර්ග සැලසුම් කිරීමට මෙවැනි දියුණු තාක්ෂණික මෙවලම් භාවිත කිරීම බෙහෙවින් ප්රයෝජනවත් වනු ඇත.
