රට තුළ පවතින උග්ර ඉන්ධන අර්බුදය හමුවේ බලශක්ති සංචිත සුරක්ෂිත කරගැනීම වෙනුවෙන් රාජ්ය සේවකයන් සඳහා ප්රකාශයට පත් කළ “බදාදා නිවාඩුව” ක්රියාත්මක කළ යුතු ආකාරය පිළිබඳව රාජ්ය පරිපාලන අමාත්යාංශය විසින් නවතම චක්රලේඛය නිකුත් කර තිබේ. මෙම නිවේදනයට අනුව, සෑම සතියකම බදාදා දිනය රජයේ නිවාඩු දිනයක් ලෙස සැලකෙන බැවින්, එදිනට නියමිත රාජකාරී කටයුතු සතියේ අඟහරුවාදා දින තුළ නිම කිරීමට කටයුතු කළ යුතුය. පවතින ගෝලීය අස්ථාවරත්වය හමුවේ දේශීය ආර්ථිකය කළමනාකරණය කිරීමට කැබිනට් මණ්ඩලය විසින් පිහිටුවන ලද අධීක්ෂණ කමිටුවල නිර්දේශ මත මෙම පියවර ගෙන ඇත.
කෙසේ වුවද, සේවයේ අත්යවශ්යතාවය සලකා යම් නිලධාරියෙකු බදාදා දින සේවයට කැඳවීමට ආයතන ප්රධානියාට බලය පවතින නමුත්, එලෙස කැඳවනු ලබන නිලධාරීන් සඳහා අතිකාල දීමනා, නිවාඩු දින වැටුප් හෝ හිලව් නිවාඩු ලබා නොදිය යුතු බව චක්රලේඛයේ දැඩිව අවධාරණය කර තිබේ. එසේම, බදාදා දින වසා තබන කාර්යාලවල නිලධාරීන් එම සතියේ සෙනසුරාදා හෝ ඉරිදා දිනවල අතිකාල ගෙවීමේ පදනම මත සේවයේ යෙදවීම ද තහනම් කර ඇත. නමුත් හදිසි අවශ්යතාවයක් මත සති අන්තයේ සේවයට කැඳවීමට සිදුවුවහොත්, අදාළ ලේකම්වරයාගේ හෝ දෙපාර්තමේන්තු ප්රධානියාගේ පූර්ව අනුමැතිය ඇතිව පමණක් එය කළ හැකි අතර, එවැනි අවස්ථාවලදී පමණක් අදාළ දීමනා ගෙවීමට බාධාවක් නොමැති බව රජය පවසයි.
මෙම නව රෙගුලාසි හරහා රජයේ දෛනික වියදම් සහ ඉන්ධන භාවිතය අවම කර ගනිමින්, ජනතාවට අවශ්ය අත්යවශ්ය සේවාවන් බාධාවකින් තොරව සැපයීමට බලාපොරොත්තු වේ. මැදපෙරදිග යුද වාතාවරණය හේතුවෙන් ලෝක වෙළඳපොළේ බොරතෙල් මිල බැරලයකට ඩොලර් 103 මට්ටමේ පවතින මෙවැනි කාලසීමාවක, මෙරට බලශක්ති අර්බුදය පාලනය කිරීමට රජය ගන්නා මෙම ක්රියාමාර්ග අතිශය තීරණාත්මක වනු ඇත.
