ඉරාන ජාතික ආරක්ෂක කවුන්සිලයේ ප්රධානී අලි ලාරිජානි සහ බසීජ් (Basij) බලකායේ අණදෙන නිලධාරියා ඉලක්ක කරමින් එල්ල වූ ප්රහාර සම්බන්ධයෙන් ඊශ්රායල අගමැති බෙන්ජමින් නෙතන්යාහු අද (17) විශේෂ ප්රකාශයක් කළේය. ඔහු අවධාරණය කළේ ඊශ්රායලය මෙම ප්රහාර හරහා ඉරාන පාලන තන්ත්රය අඩපණ කරමින් සිටින්නේ, එරට ජනතාවට එම පාලනය පෙරලා දැමීමට අවස්ථාවක් ලබා දීමේ බලාපොරොත්තුවෙන් බවයි.
පූර්ව පටිගත කරන ලද වීඩියෝ පටයක් මගින් අදහස් දැක්වූ නෙතන්යාහු, ඝාතනයට ලක්වූ අලි ලාරිජානිව හඳුන්වා දුන්නේ “ඉරානය පාලනය කරන මැර කල්ලියක් බඳු විප්ලවීය ආරක්ෂක බලකායේ (IRGC) ලොක්කා” ලෙසයි. එමෙන්ම බසීජ් අණදෙන නිලධාරී ගොලම්රේසා සොලෙයිමානි, තෙහෙරාන් වීදිවල ඉරාන වැසියන්ට එරෙහිව භීෂණය පතුරුවාලීමට සහය වූ පුද්ගලයෙකු බව ද ඔහු චෝදනා කළේය.
තවද, අමෙරිකානු ජනාධිපති ඩොනල්ඩ් ට්රම්ප් සමඟ තමන් පෞද්ගලිකව සාකච්ඡා කළ බව හෙළි කළ අගමැතිවරයා, ගල්ෆ් කලාපයේ අමෙරිකානු මිතුරන්ට සහය වීම සඳහා ඊශ්රායල සහ අමෙරිකානු ගුවන් හා නාවික හමුදා ඒකාබද්ධව කටයුතු කරන බව ප්රකාශ කළේය. ඉරාන පාලනයට දැඩි පීඩනයක් එල්ල කිරීම සඳහා වක්ර ප්රහාර මෙන්ම සෘජු මෙහෙයුම් ද දියත් කරන බව ඔහු වැඩිදුරටත් පැවසීය. ඉදිරියේදී තවත් බොහෝ “පුදුම කිරීම්” බලාපොරොත්තු විය හැකි බවත්, සූක්ෂ්ම උපාය මාර්ග හරහා මෙම යුද්ධය මෙහෙයවන බවත් පවසමින් නෙතන්යාහු සිය ප්රකාශය අවසන් කළේය.
