තෙල් මත පනවා ඇති වැට් බදු ඇතුළු අනෙකුත් බදු ඉවත් කර, වරායට ගොඩබාන මූලික මිලටම ජනතාවට ඉන්ධන ලබා දීමට රජය කටයුතු කළ යුතු බව විපක්ෂ නායක සජිත් ප්රේමදාස මහතා ඊයේ (17) පාර්ලිමේන්තුවේදී ප්රකාශ කළේය. පවතින ආර්ථික පීඩනය හමුවේ ජනතාවට සහනයක් සැලසීම රජයේ වගකීමක් බව ඔහු මෙහිදී අවධාරණය කළේය.
ස්ථාවර නියෝග යටතේ ප්රශ්නයක් යොමු කරමින් විපක්ෂ නායකවරයා රජයෙන් ඉල්ලා සිටියේ දැනට රට සතු ඉන්ධන සංචිත ප්රමාණය සහ හදිසි අවස්ථාවකදී භාවිත කළ හැකි සංචිත පිළිබඳව සත්ය තොරතුරු රටට හෙළි කරන ලෙසයි. ගෝලීය වෙළඳපොළේ තෙල් මිල ඉහළ ගියහොත් එය මෙරට උද්ධමනයට සහ ජාතික ආර්ථිකයට එල්ල කරන බලපෑම පිළිබඳව බලශක්ති අමාත්යාංශය සතුව ඇති ගණනය කිරීම් ඉදිරිපත් කරන ලෙසද ඔහු ඉල්ලා සිටියේය.
වත්මන් QR කේත ක්රමවේදය තුළ පවතින ගැටලු හේතුවෙන් ඇතැම් වෘත්තීන්ට වෙන් කර ඇති ඉන්ධන කෝටාව ප්රමාණවත් නොවන බව පෙන්වා දුන් ප්රේමදාස මහතා, විකල්ප බලශක්ති ප්රභවයන් කෙරෙහි රජයේ අවධානය කඩිනමින් යොමු විය යුතු බවද පැවසීය. විශේෂයෙන් රුසියාව වැනි රටවලින් සහන මිලට ඉන්ධන ලබා ගැනීමට රජය පියවර නොගන්නේ මන්දැයි ඔහු මෙහිදී ප්රශ්න කළේය.
ගෝලීය සැපයුම් දාමයන්ට බාධා එල්ල වන මෙවන් අවස්ථාවක, සියලු අමාත්යාංශ ඒකාබද්ධ වී මෙරට ඉන්ධන සැපයුම අඛණ්ඩව පවත්වාගෙන යාම සඳහා විධිමත් ක්රමෝපායික සැලැස්මක් සකස් කළ යුතු බව විපක්ෂ නායකවරයා වැඩිදුරටත් අවධාරණය කළේය.
