ඊයේ (17) දිනයේ ලෝක වෙළෙඳපොළේ බොරතෙල් මිල සියයට 3කින් ඉහළ ගියද, අද (18) වන විට එහි සුළු අඩුවීමක් දක්නට ලැබෙන බව විදෙස් මාධ්ය වාර්තා කරයි. මැදපෙරදිග තෙල් සැපයුම සම්බන්ධයෙන් ඇති වූ නව එකඟතාවන් මීට ප්රධාන වශයෙන් බලපා තිබේ.
බ්රෙන්ට් (Brent) වර්ගයේ බොරතෙල් බැරලයක මිල ශත 67කින් එනම් 0.65%කින් පහළ වැටී ඇති අතර එහි නව මිල සටහන් වන්නේ ඇමෙරිකානු ඩොලර් 102.75ක් ලෙසයි. ඇමෙරිකානු (WTI) බොරතෙල් බැරලයක මිල ද ඩොලර් 1.18කින් එනම් 1.23%කින් පහළ ගොස් ඇති අතර එහි මිල ඩොලර් 95.03ක් ලෙස වාර්තා වේ.
ඉරාක රජය සහ කර්ඩිෂ් බලධාරීන් අතර ඇති වූ විශේෂ එකඟතාවකට අනුව තුර්කියේ සෙයිහාන් (Ceyhan) වරාය හරහා යළිත් තෙල් අපනයනය ආරම්භ කිරීමට පියවර ගෙන තිබේ. මෙම තීරණයත් සමඟ ගෝලීය වෙළෙඳපොළට තෙල් සැපයීම පිළිබඳ පැවති අවිශ්වාසය දුරු වීම මිල පහළ යාමට හේතු වී ඇති බව ආර්ථික විද්යාඥයෝ පෙන්වා දෙති.
පවතින භූ-දේශපාලනික අර්බුද මධ්යයේ වුවද මෙලෙස මිල පහළ යාම තෙල් ආනයනය කරන රටවලට යම් අස්වැසිල්ලක් වනු ඇතැයි අපේක්ෂා කෙරේ.
