ආසියානු කුසලාන පාපන්දු තරගාවලිය අතරතුර ඕස්ට්රේලියාවෙන් දේශපාලන රැකවරණ ඉල්ලා සිටි ඉරාන ජාතික කාන්තා පාපන්දු කණ්ඩායමේ ක්රීඩිකාවන් පස්දෙනෙකු, සිය තීරණය ඉල්ලා අස්කර ගැනීමෙන් පසු යළි ඉරානයට පැමිණ තිබේ. මැලේසියාව සහ ඕමාන් හරහා තුර්කියට පැමිණි ඔවුන්, බදාදා පස්වරුවේ තුර්කි දේශසීමාව හරහා ඉරානයට ඇතුළු වූ බව විදෙස් මාධ්ය වාර්තා කළේය. තරගාවලියේ ආරම්භක තරගයේදී ඉරාන ජාතික ගීය ගායනා කිරීමෙන් වැළකී සිටීම හේතුවෙන් තමන්ට එරටදී දඬුවම් විඳීමට සිදුවනු ඇතැයි යන බිය මත මෙම ක්රීඩිකාවන් මුලින් මානුෂීය වීසා (Humanitarian Visas) ඉල්ලා සිටියද, මානව හිමිකම් ක්රියාකාරීන් පවසන්නේ ඔවුන්ගේ පවුල්වල සාමාජිකයින්ට එල්ල වූ තර්ජන හමුවේ මෙම තීරණය වෙනස් කිරීමට ඔවුන්ට බලපෑම් එල්ල වන්නට ඇති බවයි.
මෙලෙස යළි පැමිණි පිරිස අතර සහ්රා සොල්තාන් මෙෂ්කේකාර්, මොනා හමුදි සහ සහ්රා සර්බාලි යන ක්රීඩිකාවන් සිටින බව ක්රියාකාරීන් විසින් හඳුනාගෙන ඇති අතර, කණ්ඩායමේ නායිකා සහ්රා ගන්බාරි ද සිය තීරණය වෙනස් කරගත් පිරිසට ඇතුළත් බව ඉරාන රාජ්ය මාධ්ය තහවුරු කළේය. කෙසේ වෙතත්, රැකවරණ පැතූ කණ්ඩායමෙන් ක්රීඩිකාවන් දෙදෙනෙකු පමණක් තවමත් ඕස්ට්රේලියාවේ රැඳී සිටින බව වාර්තා වේ. මාර්තු 2 වනදා ඇමෙරිකාව සහ ඉරානය අතර යුද්ධය ආරම්භ වීමෙන් පසු ජාතික ගීය ගායනා නොකිරීම සම්බන්ධයෙන් ඉරාන රාජ්ය රූපවාහිනිය මෙම ක්රීඩිකාවන් “ද්රෝහීන්” ලෙස හැඳින්වීම ඔවුන්ගේ ආරක්ෂාව පිළිබඳ දැඩි සැකයක් මතු කිරීමට හේතු විය.
ඕස්ට්රේලියානු ස්වදේශ කටයුතු අමාත්ය ටෝනි බර්ක් මහතා මීට පෙර තහවුරු කළේ රැකවරණ පැතූ ක්රීඩිකාවන් පස්දෙනෙකු පොලිස් ආරක්ෂාව යටතේ ආරක්ෂිත ස්ථානයකට යොමු කළ බවත්, ඔවුන්ට පදිංචිය සහ රැකියාව සඳහා අවශ්ය වීසා බලපත්ර අනුමත කළ බවත්ය. නමුත් පසුව ඔවුන් සිය තීරණය වෙනස් කර ගැනීම සම්බන්ධයෙන් අදහස් දක්වමින් අමාත්යවරයා පැවසුවේ එවැනි තීරණ ගන්නා පසුබිම (Context) පිළිබඳව රජයට මැදිහත් විය නොහැකි බවයි. මේ අතර, ඉරාන ක්රීඩා අමාත්යාංශය ප්රකාශ කළේ සිය “දේශප්රේමීත්වය” හරහා සතුරාගේ සැලසුම් පරාජය කළ බව වන අතර, ඉරාන පාලනයට හිතවාදී තස්නිම් (Tasnim) පුවත් ඒජන්සිය චෝදනා කළේ ඕස්ට්රේලියාවේදී ක්රීඩිකාවන්ට මනෝවිද්යාත්මක යුද්ධයකට මුහුණ දීමට සිදු වූ බවයි.
