ශ්රී ලංකා පොලිස් ඉතිහාසයේ ප්රථම වරට රාජකාරිය වෙනුවෙන් දිවිපිදූ සභාන් නිලධාරියා අනුස්මරණය කරමින් 162 වැනි පොලිස් විරු අනුස්මරණ දිනය හෙට (මාර්තු 21) පොලිස් ක්ෂේත්ර බලකා මූලස්ථානයේදී අභිමානයෙන් සැමරීමට නියමිතයි. පොලිස්පති නීතිඥ ප්රියන්ත වීරසූරිය මහතාගේ ප්රධානත්වයෙන් පැවැත්වෙන මෙම උත්සවයේදී මියගිය සහ ආබාධිත වූ පොලිස් විරුවන් වෙනුවෙන් උපහාර පිදීම සිදු කෙරේ.
පොලිස් විරු ඉතිහාසයේ වැදගත් සන්ධිස්ථාන කිහිපයක් පවතී. ඒ අනුව 1864 මාර්තු 21 වන දින උතුවන්කන්දේ සරදියල් අත්අඩංගුවට ගැනීමට යාමේදී මම්මලේ මරික්කාර් තැබූ වෙඩි පහරින් මියගිය සභාන් නිලධාරියා මෙරට ප්රථම පොලිස් විරුවා ලෙස ඉතිහාසයට එක්විය.
දශක තුනක යුද්ධය හේතුවෙන් පොලිස් නිලධාරීන් 2,598ක් දිවිපිදූ අතර රටේ නීතිය හා සාමය ආරක්ෂා කිරීමේදී මියගිය සමස්ත නිලධාරීන් සංඛ්යාව 3,191කි. හෙට පැවැත්වෙන උත්සවයේදී දිවිපිදූ නිලධාරීන්ගේ යැපෙන්නන් සහ ආබාධිත විශ්රාමික නිලධාරීන් පොලිස් ක්ෂේත්ර බලකා මූලස්ථානයේ පිහිටි රණවිරු ස්මාරකය වෙත පුෂ්පෝපහාර දැක්වීමට නියමිතයි.
වර්තමානයේදී ද සංවිධානාත්මක අපරාධ, මත්ද්රව්ය ජාවාරම් සහ රථවාහන අනතුරු හමුවේ සිය ජීවිත අවදානම නොතකා කටයුතු කරන පොලිස් නිලධාරීන්ගේ සේවය මෙහිදී විශේෂ ඇගයීමට ලක් කෙරේ. මෑතකදී අම්බලන්ගොඩ ප්රදේශයේ මාර්ග බාධක රාජකාරියේදී මෝටර් රථයකට යටවී මියගිය නිලධාරියා ඇතුළු සියලුම විරුවන් “හිරු නැඟ එන මොහොතේ ද හිරු බැස යන මොහොතේ ද” සදා අනුස්මරණය කරන බව ශ්රී ලංකා පොලිසිය පවසයි.
