මැදපෙරදිග යුදමය තත්ත්වය හමුවේ බලශක්ති මිල ශීඝ්රයෙන් ඉහළ යෑම සැලකිල්ලට ගනිමින්, විදුලිය සඳහා පනවා ඇති බදු අඩු කරන ලෙස යුරෝපා කොමිසම සිය සාමාජික රටවලින් ඉල්ලා සිටියි. යුරෝපා කොමිසමේ සභාපති උර්සුලා වොන් ඩර් ලේන් මහත්මිය පෙන්වා දෙන්නේ වර්තමානයේ ඇතැම් අවස්ථාවලදී විදුලිය සඳහා අය කරන බදු පොසිල ඉන්ධනවලට වඩා 15 ගුණයකින් පමණ වැඩි අගයක් ගන්නා බවයි.
ඉරානය ආශ්රිතව පවතින ගැටුම්කාරී තත්ත්වය හේතුවෙන් යුරෝපයේ ගෑස් මිල පෙර පැවති මට්ටමට වඩා මේ වන විට දෙගුණයකටත් වඩා ඉහළ ගොස් තිබේ. මෙම තත්ත්වය හමුවේ පාරිභෝගිකයන් සහ ව්යාපාරික ආයතන මුහුණ දෙන මූල්ය පීඩනය අවම කිරීම සඳහා විදුලිය මත පනවා ඇති බදු අනුපාත කඩිනමින් අඩු කළ යුතු බව කොමිසමේ ස්ථාවරය වී ඇත.
මීට අමතරව, සමාගම්වලට පොසිල ඉන්ධන භාවිතයෙන් ඉවත් වී පුනර්ජනනීය බලශක්ති ප්රභවයන් වෙත යොමු වීම සඳහා අවශ්ය මූල්ය ආධාර සහ ආයෝජන පහසුකම් ලබා දීමේ යෝජනාවලියක් ද සභාපතිනිය විසින් යුරෝපීය නායකයන් වෙත ඉදිරිපත් කර තිබේ. විදුලිය සඳහා අය කරන බදු පොසිල ඉන්ධනවලට වඩා අඩුවෙන් පවත්වා ගැනීම සහතික කිරීම හරහා හරිත බලශක්ති පරිවර්තනය වේගවත් කිරීම මෙහි තවත් අරමුණකි.
