ඇමරිකාව, ඊශ්රායලය සහ ඉරානය කේන්ද්ර කරගනිමින් බටහිර ආසියාවේ (මැදපෙරදිග) ඇවිළී යන දරුණු යුදමය වාතාවරණය හමුවේ ජීවිතක්ෂයට පත් වූ ඉන්දීය ජාතිකයන් සංඛ්යාව හය දෙනෙකු දක්වා ඉහළ ගොස් ඇති බව ඉන්දීය විදේශ කටයුතු අමාත්යාංශය තහවුරු කරයි. ඉකුත් බදාදා (18) ඉරානය විසින් සෞදි අරාබියේ රියාද් අගනුවර ඉලක්ක කර එල්ල කරන ලද මිසයිල සහ ඩ්රෝන ප්රහාරයකින් එක් ඉන්දීය ජාතිකයෙකු මියගොස් ඇති අතර, මෙය සෞදි අරාබිය තුළ ඉන්දීය ජාතිකයෙකු යුද්ධය නිසා මියගිය පළමු අවස්ථාව ලෙස සටහන් වේ. මීට පෙර ඕමානයේ කාර්මික කලාපයකට එල්ල වූ ප්රහාරයකින් දෙදෙනෙකු සහ වෙළෙඳ නෞකාවලට එල්ල වූ ප්රහාරවලින් තිදෙනෙකු ද මියගොස් තිබුණි.
මෙම යුද ගැටුම් හේතුවෙන් සෞදි අරාබිය, එක්සත් අරාබි එමීර් රාජ්යය, ඕමානය සහ ඉරාකය වැනි රටවල සේවය කරන ඉන්දීය කම්කරුවන් සහ නාවිකයන් රැසක් තුවාල ලබා ඇති බව ද වාර්තා වේ. පසුගියදා ඉරාකයේ බස්රා නුවර අසලදී ප්රහාරයකට ලක්වූ ඇමරිකානු තෙල් ප්රවාහන නෞකාවක සිටි ඉන්දීය කාර්ය මණ්ඩල සාමාජිකයන් 15 දෙනෙකු සෞදි අරාබිය හරහා යළි ඉන්දියාවට ගෙන්වා ගැනීමට මේ වන විට කටයුතු යොදා ඇත. පෙබරවාරි 28 වනදා යුද්ධය ආරම්භ වූ දින සිට මේ දක්වා ඉන්දීය ජාතිකයන් ලක්ෂ තුනකට අධික පිරිසක් මැදපෙරදිග කලාපයෙන් යළි සිය මවුබිම කරා පැමිණ තිබේ.
කලාපය පුරා විසිරී සිටින මිලියන 10කට අධික ඉන්දීය වැසියන්ගේ ආරක්ෂාව තහවුරු කිරීම සඳහා ඉන්දීය රජය අදාළ රටවල නායකයන් සමඟ අඛණ්ඩව සාකච්ඡා පවත්වමින් සිටින බව විදේශ කටයුතු අමාත්යාංශ ලේකම් අසීම් මහාජන් මහතා ප්රකාශ කළේය. මැදපෙරදිග පවතින මෙම අනාරක්ෂිත තත්ත්වය හේතුවෙන් එහි වෙසෙන ශ්රී ලාංකිකයන්ට ද යම් බලපෑම් එල්ල විය හැකි බැවින්, විදේශයන්හි සිටින මෙරට ශ්රමිකයන්ගේ ආරක්ෂාව පිළිබඳව ද මෙරට බලධාරීන් අවධානයෙන් පසුවන බව වාර්තා වේ.
