ඔස්ට්රේලියාව සහ යුරෝපා සංගමය (EU) අතර අත්සන් කරන ලද නව නිදහස් වෙළඳ ගිවිසුම යටතේ ඔස්ට්රේලියානු කෘෂිකාර්මික නිෂ්පාදන සඳහා පනවා තිබූ අපනයන බදු ඉවත් කිරීමට පියවර ගෙන තිබේ. වසර අටක සාකච්ඡාවලින් පසු එළඹුණු මෙම ඓතිහාසික එකඟතාව ඔස්ට්රේලියානු ඩොලර් බිලියන 10ක් (ඇමරිකානු ඩොලර් බිලියන 7ක්) පමණ වටිනාකමකින් යුක්ත වන අතර, එය දෙපාර්ශවයටම ජයග්රාහී “Win-Win” තත්ත්වයක් බව ඔස්ට්රේලියානු අග්රාමාත්ය ඇන්තනි ඇල්බනීස් සහ යුරෝපා කොමිසමේ සභාපතිනී උර්සුලා වොන් ඩර් ලේයන් ප්රකාශ කළහ.
මෙම ගිවිසුම යටතේ වයින්, පලතුරු, එළවළු, මුහුදු ආහාර සහ තිරිඟු වැනි නිෂ්පාදන සඳහා යුරෝපා සංගමය පනවා තිබූ බදු ඉවත් කෙරෙනු ඇත. විශේෂයෙන්ම වයින් අපනයනකරුවන්ට මෙමගින් වසරකට ඩොලර් මිලියන 37ක පමණ ඉතිරියක් සැලසේ. ආහාර සඳහා නම් භාවිත කිරීමේ (Naming Rights) මතභේදාත්මක ගැටලුවේදී ද ඔස්ට්රේලියාවට සහනයක් ලැබී ඇති අතර, ඉතාලියෙන් පිටත ‘Prosecco’ යන නාමය භාවිත කිරීමට අවසර ලත් එකම රට බවට ඔස්ට්රේලියාව පත්ව තිබේ. කෙසේ වෙතත්, හරක් මස් අපනයනය සඳහා වසරකට ටොන් 30,000ක සීමාවක් පනවා ඇති අතර, එය තම අපේක්ෂාවන්ට වඩා අඩු මට්ටමක පවතින බව ඔස්ට්රේලියානු මස් නිෂ්පාදකයන්ගේ සංගමය පෙන්වා දෙයි.
වෙළඳාමට අමතරව ආරක්ෂක, අභ්යවකාශ සහ සමුද්රීය ආරක්ෂාව යන ක්ෂේත්රයන්හි සහයෝගීතාව වර්ධනය කර ගැනීමට ද දෙරට අතර නව හවුල්කාරිත්වයක් අත්සන් කෙරිණි. ලිතියම් (Lithium) වැනි තීරණාත්මක ඛනිජ සම්පත් සම්බන්ධයෙන් ද යුරෝපා සංගමය ඔස්ට්රේලියාව සමඟ සමීපව කටයුතු කිරීමට නියමිතය. ලෝක දේශපාලන හා ආර්ථික රටාවන් වේගයෙන් වෙනස් වන මොහොතක, විශ්වාසවන්ත හවුල්කරුවන් ලෙස ඉදිරියට යාම මෙම ගිවිසුම්වල මූලික අරමුණ බව උර්සුලා වොන් ඩර් ලේයන් වැඩිදුරටත් අවධාරණය කළාය.
