මැදපෙරදිග කලාපයේ පවතින උග්ර යුදමය තත්ත්වය හේතුවෙන් පිලිපීනයේ බලශක්ති සැපයුමට එල්ල වී ඇති “සන්නද්ධ තර්ජනය” සැලකිල්ලට ගනිමින් එරට ජනාධිපති ෆර්ඩිනන්ඩ් මාකෝස් (කනිෂ්ඨ) මහතා අද (24) සිට ක්රියාත්මක වන පරිදි ජාතික බලශක්ති හදිසි අවස්ථාවක් ප්රකාශයට පත් කළේය. ගෝලීය බලශක්ති වෙළඳපොළේ පවතින අවිනිශ්චිතතාව, සැපයුම් ජාල බිඳවැටීම සහ ජාත්යන්තර වෙළඳපොළේ තෙල් මිල ශීඝ්රයෙන් ඉහළ යාම හමුවේ පිලිපීනයේ බලශක්ති සුරක්ෂිතතාව සහ දේශීය ආර්ථිකය ආරක්ෂා කර ගැනීම මෙම පියවරේ මූලික අරමුණයි.
වසරක කාලයක් පුරා ක්රියාත්මක වීමට නියමිත මෙම හදිසි ප්රකාශනය මඟින් ඉන්ධන, ආහාර, ඖෂධ සහ කෘෂිකාර්මික නිෂ්පාදන ඇතුළු අත්යවශ්ය ද්රව්යවල බෙදාහැරීම සහ ලබාගත හැකි බව සහතික කිරීම සඳහා විශේෂ කමිටුවක් ද පිහිටුවා ඇත. මෙමඟින් රජයට පවතින නීතිමය සීමාවන්ගෙන් බැහැරව කඩිනමින් ඉන්ධන සහ තෙල් නිෂ්පාදන මිලදී ගැනීමටත්, අවශ්ය වුවහොත් ගිවිසුම්ගත මුදලින් කොටසක් කල්තියා ගෙවීමටත් බලය හිමි වේ. පිලිපීන බලශක්ති ලේකම් ෂැරන් ගැරින් මහත්මිය සඳහන් කළේ මේ වන විට එරට සතුව පවතින්නේ දින 45කට පමණක් සෑහෙන ඉන්ධන සංචිතයක් බවයි. ඒ අනුව, බෆර් සංචිතය (Buffer Stock) ඉහළ නැංවීම සඳහා අග්නිදිග ආසියාවෙන් සහ වෙනත් කලාපවලින් තෙල් බැරල් මිලියනයක් මිලදී ගැනීමට රජය දැනටමත් සාකච්ඡා අරඹා තිබේ.
යුදමය වාතාවරණය හමුවේ පිලිපීන පෙසෝ මුදලේ අගය පහත වැටීම, විදේශ ප්රේෂණ අඩුවීම සහ උද්ධමනය ඉහළ යාම පිළිබඳව දැඩි අවධානයෙන් පසුවන ලෙස ජනාධිපතිවරයා එරට මුදල් අමාත්යාංශයට සහ මධ්යම බැංකුවට නියෝග කර ඇත. කෙසේ වෙතත්, ඉන්ධන මිල ඉහළ යාම පාලනය කිරීමට රජය අපොහොසත් වී ඇති බව පවසමින් එරට ප්රවාහන සේවකයන් සහ පාරිභෝගික කණ්ඩායම් ලබන බ්රහස්පතින්දා සිට දින දෙකක වැඩ වර්ජනයක් දියත් කිරීමට ද සැලසුම් කර තිබේ. මෙම තත්ත්වය හමුවේ පිලිපීන ආර්ථික වර්ධනය මන්දගාමී වීමේ අවදානමක් පවතින බව එරට ආර්ථික විශේෂඥයෝ අනතුරු අඟවති.
