ඉන්දියාවේ ලෝක් සභාවේ (Lok Sabha) සහ ප්රාන්ත සභාවල කාන්තා නියෝජනය සඳහා 1/3ක (33%) අසුන් වෙන් කිරීමේ නීතිය, ජනසංගණන සහ සීමා නිර්ණ කටයුතු අවසන් කිරීමට පෙර ක්රියාත්මක කිරීමට අගමැති නරේන්ද්ර මෝදි ගෙන ඇති තීරණය ඉන්දීය කොංග්රස් පක්ෂයේ දැඩි දෝෂදර්ශනයට ලක්ව තිබේ. අගමැතිවරයා සිය ස්ථාවරය නිරන්තරයෙන් වෙනස් කරන බව පවසමින් කොංග්රස් පක්ෂය ඔහුව “U-turn Ustad” (ආපසු හැරෙන හාදයා) ලෙස හඳුන්වමින් අද (2026 මාර්තු 25) නව දිල්ලියේදී විවේචනය කළේය. මෙම සංශෝධන සම්මත කර ගැනීම සඳහා ඉදිරි සති දෙක ඇතුළත දින දෙකක විශේෂ පාර්ලිමේන්තු වාරයක් කැඳවීමට රජය සූදානම් වන නමුත් 2023 වසරේදී මෙම පනත හඳුන්වා දෙන විට රජය ප්රකාශ කළේ ජනසංගණනය සහ සීමා නිර්ණ කටයුතු අවසන් වන තෙක් එය ක්රියාත්මක කළ නොහැකි බවයි.
එහෙත් දැන් එම කටයුතු අවසන් වීමට පෙර එය ක්රියාත්මක කිරීමට සැරසීම දේශපාලන උපක්රමයක් බව පවසන විපක්ෂය, ලෝක් සභාවේ සහ ප්රාන්ත සභාවල මන්ත්රී ආසන සංඛ්යාව 50% කින් ඉහළ නැංවීමට මෝදි රජය දරන සැලසුම් පිළිබඳව ද කොංග්රස් මහා ලේකම් ජයිරාම් රමේෂ් (Jairam Ramesh) හරහා අවධාරණය කළේය. මෙම පියවර මගින් ඉන්දියාව දැනට මුහුණ දී සිටින විදේශ ප්රතිපත්තිමය පසුබෑම් සහ බලශක්ති අර්බුදයෙන් මහජන අවධානය වෙනතකට යොමු කිරීමට රජය උත්සාහ කරන බවට කොංග්රස් පක්ෂය චෝදනා කරයි. මේ හේතුවෙන් අප්රේල් 29 වනදා ප්රාන්ත සභා මැතිවරණ අවසන් වූ පසු සර්ව පාක්ෂික සමුළුවක් කැඳවා මේ පිළිබඳ සාකච්ඡා කරන ලෙස විපක්ෂ කණ්ඩායම් රජයෙන් ඉල්ලා සිටී.
