අමෙරිකා-ඉරාන යුද්ධය හේතුවෙන් ගෝලීය ඉන්ධන මිල ශීඝ්රයෙන් ඉහළ ගොස් ඇති පසුබිමක, එම යුද උපායමාර්ගය පිළිබඳව සැක පළ කරන G7 මිත්ර රටවල් එකඟ කරවා ගැනීම සඳහා අමෙරිකානු රාජ්ය ලේකම් මාර්කෝ රුබියෝ (Marco Rubio) මේ සතියේ ප්රංශයේ සංචාරයක නිරත වීමට නියමිතය. ලබන සිකුරාදා (2026 මාර්තු 27) පැරිස් නුවරට නුදුරු වර්සායි (Versailles) හි පැවැත්වෙන G7 විදේශ අමාත්යවරුන්ගේ හමුවට සහභාගී වෙමින් ඔහු අමෙරිකාවේ ආරක්ෂක අවශ්යතා සහ කලාපීය සහයෝගීතාව පිළිබඳව සාකච්ඡා කරනු ඇතැයි අද (2026 මාර්තු 25) අමෙරිකානු රාජ්ය දෙපාර්තමේන්තුව ප්රකාශ කළේය.
ජනාධිපති ඩොනල්ඩ් ට්රම්ප් විසින් ඉරානය සමඟ සාම සාකච්ඡා පවතින බව ප්රකාශ කළද ඉරානය එය ප්රතික්ෂේප කර ඇති අතර හෝමුස් සමුද්ර සන්ධිය අවහිර වීම නිසා ලෝක තෙල් මිල අහස උසට ඉහළ ගොස් තිබේ. බ්රිතාන්යය, කැනඩාව, ප්රංශය, ජර්මනිය, ඉතාලිය සහ ජපානය යන G7 රටවල් අමෙරිකා-ඊශ්රායල හමුදා ක්රියාමාර්ගය කෙරෙහි මෙතෙක් දක්වා ඇත්තේ මන්දගාමී ප්රතිචාරයකි. හෝමුස් සමුද්ර සන්ධිය යළි විවෘත කිරීම සඳහා උදව් කරන ලෙස කළ ඉල්ලීම්වලට සහාය නොදීම හේතුවෙන් ජනාධිපති ට්රම්ප් මීට පෙර නේටෝ (NATO) සහ G7 රටවල් විවේචනයට ලක් කළද ඇතැම් රටවල් දැන් එම මුහුදු මාර්ගයේ ආරක්ෂාව වෙනුවෙන් පෙනී සිටීමට කැමැත්ත පළ කර තිබේ.
මෙම හමුවේදී රුසියා-යුක්රේන යුද්ධය, මැදපෙරදිග වත්මන් තත්ත්වය සහ ගෝලීය සාමයට එල්ල වී ඇති තර්ජන පිළිබඳව ද විශේෂ අවධානයක් යොමු කිරීමට නියමිතය. රුබියෝගේ මෙම සංචාරය හරහා අමෙරිකාව බලාපොරොත්තු වන්නේ ඉරාන යුද්ධය සම්බන්ධයෙන් තම මිත්ර රටවල් අතර පවතින මතභේද අවම කරගනිමින් පොදු එකඟතාවකට පැමිණීමටයි.
