පවතින ඉන්ධන හිඟය සහ ප්රවාහන දුෂ්කරතා හේතුවෙන් මෙරට රෝහල් පද්ධතිය දැඩි කඩාවැටීමකට ලක්වීමේ අවදානමක් පවතින බව රජයේ වෛද්ය නිලධාරීන්ගේ සංගමය (GMOA) අනතුරු අඟවයි. මෙම බරපතල තත්ත්වය පිළිබඳව සාකච්ඡා කර ඉදිරි ක්රියාමාර්ග තීරණය කිරීම සඳහා එම සංගමයේ මධ්යම කාරක සභාව අද (25) හදිසි රැස්වීමක් කැඳවා තිබේ.
රජයේ වෛද්ය නිලධාරීන්ගේ සංගමයේ ලේකම් වෛද්ය ප්රභාත් සුගතදාස මහතා පෙන්වා දෙන්නේ පවතින ඉන්ධන කෝටාව (QR) වෛද්යවරුන්ගේ දෛනික රාජකාරි සහ හදිසි සේවා කැඳවීම් සඳහා කිසිසේත්ම ප්රමාණවත් නොවන බවයි. අනෙකුත් රාජ්ය නිලධාරීන්ට මෙන් නිල ප්රවාහන පහසුකම් හෝ ඉන්ධන දීමනා හිමි නොවන පසුබිමක, වෛද්යවරුන්ට තම පෞද්ගලික වියදමින් ඉන්ධන සොයා ගැනීමට සිදුවීමත්, ඉන්ධන පෝලිම්වල ගත කිරීමට සිදුවන කාලය රෝගී සත්කාරක සේවාවලට බාධාවක් වීමත් මෙම අර්බුදයට හේතු වී ඇත. සතියක සිට බලධාරීන් දැනුවත් කළද මෙතෙක් නිසි විසඳුමක් නොලැබීම හේතුවෙන් ඉදිරි සතිය තුළ සෞඛ්ය සේවාවන් සම්පූර්ණයෙන්ම අඩාල වීමේ අවදානමක් පවතින බව ඔහු වැඩිදුරටත් අවධාරණය කළේය.
