පුද්ගලයින් ලියාපදිංචි කිරීමේ දෙපාර්තමේන්තුවේ (අයි.ඩී. කන්තෝරුවේ) පරිගණක දත්ත පද්ධතිය මෙම සතිය තුළ තෙවැනි වරටත් අද (2026 මාර්තු 26) බිඳ වැටීමකට ලක් විය. මේ හේතුවෙන් ජාතික හැඳුනුම්පත් නිකුත් කිරීමේ එක්දින සේවාව ඇතුළු සේවාවන් රැසක් සම්පූර්ණයෙන්ම ඇනහිට තිබේ.
හැඳුනුම්පත් ලබාගැනීම සඳහා දිවයිනේ විවිධ ප්රදේශවලින් පැමිණ සිටි ජනතාව සේවාවන් ඇනහිටීම හේතුවෙන් දැඩි ලෙස නොසන්සුන් වූ අතර ඔවුන් පාලනය කිරීම සඳහා පොලිසිය මැදිහත් වූ බව වාර්තා වේ. පසුගිය සඳුදා (23) ප්රථම වරට මෙම දත්ත පද්ධතිය අක්රිය වූ අතර පසුව 24 වැනිදා ද දෙපාර්තමේන්තුවේ සේවාවන් තාවකාලිකව අත්හිටුවීමට වැඩබලන කොමසාරිස් ජනරාල් එම්. එස්. පී. සූරියප්පෙරුම මහත්මිය පියවර ගෙන තිබුණි. යථා තත්ත්වයට පත් කළ බව පැවසුණ ද අද දිනයේ ද පද්ධතියේ පවතින දෝෂ හේතුවෙන් මහජනතාව දැඩි අපහසුතාවයට පත්ව සිටිති.
