මැදපෙරදිග පවතින අස්ථාවර වාතාවරණය හේතුවෙන් ගෝලීය තෙල් වෙළඳපොළේ සිදුවන දැඩි මිල උච්චාවචනයන් පාලනය කිරීමේ අරමුණින් ලබන අප්රේල් 01 වැනිදා සිට ක්රියාත්මක වන පරිදි පෙට්රල් අපනයනය තහනම් කිරීමට රුසියාව තීරණය කර තිබේ. රුසියානු නියෝජ්ය අග්රාමාත්ය ඇලෙක්සැන්ඩර් නොවැක් මහතා විසින් බලශක්ති අමාත්යාංශය වෙත මෙම නියෝගය නිකුත් කර ඇති අතර, මෙම අපනයන තහනම ජූලි 31 වැනිදා දක්වා බලාත්මක වනු ඇතැයි රුසියානු TASS පුවත් සේවය වාර්තා කරයි. රුසියානු බලශක්ති සම්පත් සඳහා විදේශීය වෙළඳපොළේ ඉහළ ඉල්ලුමක් පැවතියද, දේශීය වෙළඳපොළේ ඉන්ධන මිල ඉහළ යාම වැළැක්වීම සහ හිඟයකින් තොරව සැපයුම පවත්වාගෙන යාම මෙම තීරණයේ ප්රධාන අරමුණ වී තිබේ.
පසුගිය වසරේදී යුක්රේනය විසින් රුසියානු තෙල් පිරිපහදු ඉලක්ක කර එල්ල කළ ප්රහාර සහ උත්සව සමයන්හි මතු වූ අධික ඉල්ලුම හේතුවෙන් රුසියාවේ ප්රදේශ කිහිපයක පෙට්රල් හිඟයක් වාර්තා විය. මෙම තත්ත්වය මඟහරවා ගැනීම සඳහා රුසියාව මීට පෙර ද අවස්ථා කිහිපයකදී පෙට්රල් සහ ඩීසල් අපනයනය සීමා කිරීමට පියවර ගෙන තිබුණි. වාර්තාවලට අනුව රුසියාව පසුගිය වසරේදී පෙට්රල් මෙට්රික් ටොන් මිලියන 5කට ආසන්න ප්රමාණයක් අපනයනය කර ඇති අතර, මෙම නව තහනම ලෝක වෙළඳපොළේ ඉන්ධන මිල කෙරෙහි ද බලපෑමක් එල්ල කරනු ඇතැයි ආර්ථික විශ්ලේෂකයෝ පෙන්වා දෙති.
