මෝටර් රථ ප්රවාහන දෙපාර්තමේන්තුවේ කොමසාරිස් ජනරාල් කමල් අමරසිංහ මහතා වාහන ලියාපදිංචි කිරීමේදී සිදුවූ බව කියන අක්රමිකතාවක් සම්බන්ධයෙන් අපරාධ පරීක්ෂණ දෙපාර්තමේන්තුව (CID) විසින් අද (28) අලුයම අත්අඩංගුවට ගෙන තිබේ. පොලිස් ආරංචි මාර්ග සඳහන් කරන්නේ මෝටර් රථ ප්රවාහන දෙපාර්තමේන්තුවේ පද්ධතියට අනවසරයෙන් ඇතුළු වී හෝ ලේඛන වංචා කරමින් සිදුකළ සැකකටයුතු වාහන ලියාපදිංචියක් සම්බන්ධයෙන් දීර්ඝ කාලයක සිට පැවැති විමර්ශනයකින් පසු මෙම අත්අඩංගුවට ගැනීම සිදුකළ බවයි. කමල් අමරසිංහ මහතාගෙන් ප්රකාශ සටහන් කර ගැනීමෙන් අනතුරුව ඔහු අධිකරණයට ඉදිරිපත් කිරීමට නියමිතය.
මෙම අත්අඩංගුවට ගැනීමත් සමඟ මෝටර් රථ ප්රවාහන දෙපාර්තමේන්තුව තුළ ක්රියාත්මක වන බව කියන මහා පරිමාණ වාහන ලියාපදිංචි කිරීමේ ජාවාරම් රැසක් පිළිබඳව තොරතුරු අනාවරණය කර ගැනීමට හැකි වනු ඇතැයි විමර්ශන නිලධාරීහු විශ්වාසය පළ කරති. මීට පෙර ද එම දෙපාර්තමේන්තුවේ ඉහළ නිලධාරීන් කිහිපදෙනෙකුම මෙවැනි චෝදනා මත සේවය අත්හිටුවීමට සහ අත්අඩංගුවට පත්වීමට ලක් වූ අතර, වත්මන් රජය යටතේ දූෂණ විරෝධී මෙහෙයුම් දැඩි කිරීමේ ප්රතිඵලයක් ලෙස මෙම පියවර ගෙන ඇති බව වාර්තා වේ. සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුවේ විශේෂ කණ්ඩායමක් වැඩිදුර විමර්ශන පවත්වයි.
