හිටපු ඉන්දීය අගමැති රජීව් ගාන්ධි ඝාතන නඩුව සම්බන්ධයෙන් වසර 31ක් සිරගතව සිටි ඒ.ජී. පෙරාරිවාලන් (AG Perarivalan), මද්රාස් මහාධිකරණයේ නීතිඥයෙකු ලෙස සිය නව ජීවිතය ආරම්භ කර තිබේ. 1991 වසරේදී වයස අවුරුදු 19 දී අත්අඩංගුවට පත් වූ ඔහු, 2022 වසරේදී ඉන්දීය ශ්රේෂ්ඨාධිකරණය විසින් නිදහස් කරනු ලැබූ අතර, ඉන් අනතුරුව නීති උපාධිය ලබා 2025 වසරේදී සමස්ත ඉන්දීය නීතිඥ විභාගය සමත් විය. 54 හැවිරිදි වියේ පසුවන ඔහු පසුගිය සඳුදා තමිල්නාඩු සහ පුදුචේරි නීතිඥ සංගමයේ සාමාජිකත්වය ලබාගනිමින් දිවුරුම් දුන්නේය.
සිරගතව සිටි කාලය තුළ පෙරාරිවාලන් සිය අධ්යාපන කටයුතු අත්නොහළ අතර, ඔහු පරිගණක යෙදුම් පිළිබඳ උපාධියක් (BCA) සහ පශ්චාත් උපාධියක් (MCA) මෙන්ම තවත් ඩිප්ලෝමා පාඨමාලා කිහිපයක් ද සිරගෙදර සිටියදීම සම්පූර්ණ කළේය. ප්රසිද්ධ අපරාධ නීතිඥයෙකු වීමට වඩා, නීතිමය ආධාර ලබාගැනීමට වත්කමක් නොමැතිව සිරගෙවල් තුළ අසරණව සිටින රැඳවියන් වෙනුවෙන් හඬක් නැගීම තම අරමුණ බව ඔහු මෙහිදී ප්රකාශ කළේය. විශේෂයෙන්ම අසාධාරණ ලෙස රඳවා තබා ගැනීම් සහ නීතිමය ප්රමාදයන්ට ලක්වූවන් වෙනුවෙන් පෙනී සිටීමට තමා බලාපොරොත්තු වන බව ඔහු වැඩිදුරටත් සඳහන් කර සිටියි.
