කැනඩාව 1867 වසරේ සම්මේලනයක් ලෙස ස්ථාපිත කිරීමෙන් පසු ගතවූ වසර 150කට අධික කාලය තුළ ප්‍රථම වතාවට එරට ජනගහනය වසරක් ඇතුළත පහත වැටී ඇති බව ‘සංඛ්‍යාලේඛන කැනඩා’ (Statistics Canada) ආයතනය වාර්තා කරයි. නවතම දත්තවලට අනුව 2025 ජනවාරි සිට 2026 ජනවාරි දක්වා කාලය තුළ කැනඩාවේ ජනගහනය 102,436කින් (සියයට 0.2කින්) අඩු වී තිබේ. ජාත්‍යන්තර සිසුන් සහ තාවකාලික සේවකයින් ඇතුළු ස්ථිර නොවන පදිංචිකරුවන් (Non-permanent residents) පැමිණීම සීමා වීම මීට ප්‍රධානතම හේතුව වී ඇති බව සඳහන් වේ. 2025 වසරේ මුල් මාස හය තුළ සුළු වර්ධනයක් පෙන්නුම් කළද, වසරේ අවසාන මාස හය තුළ ජනගහනය 179,572කින් අඩු වීම හේතුවෙන් සමස්ත වාර්ෂික අගය මෙලෙස පහත වැටී ඇති බව විදෙස් මාධ්‍ය පෙන්වා දෙයි.
