දඹුල්ල ආර්ථික මධ්යස්ථානය අසල ඉදිකරමින් පවතින කෘෂි ශීතාගාර සංකීර්ණයේ ඉතිරි වැඩකටයුතු ඉදිරි සති 6ත් 8ත් අතර කාලය තුළ අවසන් කර ජනතා අයිතියට පත් කිරීමට අදාළ සියලු පාර්ශ්ව එකඟතාව පළ කර තිබේ. වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්ය වසන්ත සමරසිංහ මහතාගේ ප්රධානත්වයෙන් පැවති විශේෂ සාකච්ඡාවකදී මෙම තීරණයට එළඹ ඇත.
ඉන්දීය අග්රාමාත්යවරයා සහ ශ්රී ලංකා ජනාධිපතිවරයාගේ සහභාගීත්වයෙන් පසුගිය වසරේදී විවෘත කළ මෙම ව්යාපෘතියේ වැඩකටයුතු මෙතෙක් අවසන් නොවීම පිළිබඳව අමාත්යවරයා මෙහිදී සිය දැඩි කනගාටුව පළ කළේය.
වහලයෙන් ජලය කාන්දු වීම සහ පොළොවේ මට්ටම පිළිබඳ පවතින ගැටලුවලට අමතරව, සිසිලන පද්ධතියේ පවතින දෝෂ සහිත තත්ත්වය ව්යාපෘතිය ප්රමාද වීමට ප්රධානතම හේතුව වී ඇති බව ඉංජිනේරුමය කාර්යයන් පිළිබඳ මධ්යම උපදේශක කාර්යාංශය (CECB) පෙන්වා දෙයි.
දෝෂ සහිත සිසිලන යන්ත්ර ප්රතිස්ථාපනය කිරීම සහ ආර්ද්රතා පද්ධති නිසි පරිදි සකස් කිරීමට මෙහිදී එකඟතාව පළ විය. ඉදිකිරීම් සමාගම සඳහන් කළේ ව්යාපෘතියේ වැඩ 99%ක් අවසන් බවත්, ඉතිරි තාක්ෂණික දෝෂ සති 4ක් ඇතුළත නිවැරදි කළ හැකි බවත්ය.
විදුලි වෝල්ටීයතා වෙනස්වීම් හේතුවෙන් මිල අධික උපකරණවලට හානි වීම වැළැක්වීම සඳහා වෝල්ටීයතා ස්ථායිකාරකයක් (Voltage Stabilizer) සවි කිරීමේ අවශ්යතාවය ද මෙහිදී අවධාරණය කෙරුණි.
මෙම ශීතාගාර සංකීර්ණය ක්රියාත්මක වීමත් සමඟ දඹුල්ල ප්රදේශයේ ගොවීන්ට සිය අතිරික්ත අස්වැන්න නාස්තියකින් තොරව ගබඩා කර ගැනීමට අවස්ථාව හිමි වන අතර, එය රටේ ආහාර සුරක්ෂිතතාවයට ද විශාල දායකත්වයක් වනු ඇත.
