ශ්රී ලංකාවේ ප්රමුඛතම මූල්ය ආයතනයක් වන LB ෆිනෑන්ස් පීඑල්සී (LB Finance PLC), ස්විට්සර්ලන්තය පදනම් කරගත් බලපෑම්කාරී වත්කම් කළමනාකරණ ආයතනයක් වන Enabling Qapital Ltd (EQ) වෙතින් ඇමෙරිකානු ඩොලර් මිලියන 15ක ජ්යෙෂ්ඨ ණය පහසුකමක් ලබා ගැනීමට සමත්ව තිබේ. EMF ක්ෂුද්ර මූල්ය අරමුදල (EMF Microfinance Fund) හරහා ලබා දී ඇති මෙම දීර්ඝකාලීන ණය පහසුකම, LB ෆිනෑන්ස් සමාගමේ උපායමාර්ගික අරමුණු සහ වගකීම් සහගත ආයෝජන හරහා සමාජීය බලපෑමක් ඇති කිරීමේ EQ ආයතනයේ මෙහෙවර අතර පවතින මනා පෑහීම විදහා දක්වන්නකි.
මෙම අරමුදල් ප්රධාන වශයෙන් ශ්රී ලංකාවේ ආර්ථිකයේ කොන්දේනිය බඳු ක්ෂුද්ර, කුඩා හා මධ්ය පරිමාණ ව්යවසාය (MSME) අංශය ශක්තිමත් කිරීම සඳහා යොදා ගැනීමට නියමිතය. එමගින් අඩු පහසුකම් සහිත ව්යවසායකයින්ට සහ කුඩා ව්යාපාරවලට අවශ්ය මූල්ය පහසුකම් සැලසීම හරහා රැකියා උත්පාදනය සහ දිළිඳුකම පිටුදැකීමට දායක වීමට සමාගම අපේක්ෂා කරයි. ජාත්යන්තර මට්ටමේ පිළිගත් බලපෑම්කාරී ආයෝජකයෙකු මෙලෙස LB ෆිනෑන්ස් කෙරෙහි විශ්වාසය තැබීම, සමාගමේ මෙහෙයුම් ශක්තිමත්භාවය සහ පාලන ව්යුහය පිළිබඳ මනා සහතිකයක් බව එම සමාගමේ කළමනාකාරීත්වය පෙන්වා දෙයි.
FINMA නියාමනයට යටත් ස්විට්සර්ලන්ත ආයතනයක් වන Enabling Qapital Ltd, දැනට ඇමෙරිකානු ඩොලර් මිලියන 800ක වත්කම් කළමනාකරණය කරන අතර ඔවුන් ක්ෂුද්ර මූල්ය, පිරිසිදු බලශක්තිය වැනි ක්ෂේත්ර කෙරෙහි විශේෂ අවධානයක් යොමු කරයි. මෙම සහයෝගීතාවය හරහා මෙරට ආර්ථික පුනර්ජීවනයට සහ මූල්ය අන්තර්ගතභාවය ඉහළ නැංවීමට විශාල දායකත්වයක් ලැබෙනු ඇතැයි විශ්වාස කෙරේ.
