නයිජීරියාවේ බෝර්නෝ (Borno) ප්රාන්තයේ ලස්සා (Lassa) නගරයේ පිහිටි ද්විතීයික පාසලකට කඩා වැදුණු සන්නද්ධ ත්රස්ත කණ්ඩායමක්, එහි විභාග ලියමින් සිටි සිසුන් ඇතුළු පිරිසක් පැහැරගෙන ගොස් ඇති අතර තවමත් සිසුන් 37 දෙනෙකු අතුරුදන්ව සිටින බව එරට නිලධාරීන් තහවුරු කරයි.
බටහිර අප්රිකානු ඉස්ලාමීය රාජ්ය (ISWAP) ත්රස්ත කණ්ඩායම විසින් සඳුදා දිනයේ මෙම ප්රහාරය එල්ල කර ඇති අතර, ප්රහාරයෙන් සෙබළෙකු සහ ගුරුවරයෙකු ඇතුළු තිදෙනෙකු ජීවිතක්ෂයට පත්ව තිබේ. ප්රාදේශීය අධ්යාපන බලධාරීන් පවසන පරිදි පැහැරගත් පිරිස අතරින් මේ වන විට තවමත් අත්අඩංගුවේ පසුවන්නේ සිසුවියන් 25 දෙනෙකු, සිසුන් 11 දෙනෙකු සහ එක් පාසල් සේවකයෙකි. පාසලේ උප විදුහල්පතිවරයා ඇතුළු අට දෙනෙකු නිදහස් කර ගැනීමට ආරක්ෂක අංශ සමත්ව ඇත.
නයිජීරියාවේ උතුරු සහ මධ්යම ප්රදේශවල ක්රියාත්මක වන සන්නද්ධ කණ්ඩායම් සහ කොල්ලකල්ලීන් විසින් කප්පම් ලබා ගැනීම සඳහා සිසුන් පැහැර ගැනීම සාමාන්ය උපක්රමයක් බවට පත් කරගෙන ඇති අතර, පසුගිය මැයි මාසයේදී ද බෝර්නෝ ප්රාන්තයේම සිසුන් 40කට අධික පිරිසක් මෙලෙස පැහැර ගැනීමට ලක්විය. 2009 වසරේ සිට නයිජීරියාවේ පවතින සන්නද්ධ අර්බුදකාරී තත්ත්වය මෑතකදී නැවතත් ඉහළ ගොස් ඇති බව දේශපාලන විචාරකයෝ පෙන්වා දෙති.
තොරතුරු උපුටා ගැනීම: AlJazeerz ඇසුරින්
