ඉදිරියේදී ඇති විය හැකි 2026-2027 එල් නිනෝ (El Niño) දේශගුණික විපර්යාස චක්රය හේතුවෙන් ශ්රී ලංකාවට එල්ල විය හැකි බලපෑම්වලට මුහුණ දීම සඳහා දේශගුණික ඔරොත්තු දීමේ හැකියාව සහ ආපදා සූදානම ශක්තිමත් කිරීමේ විශේෂ යෝජනාවලියක් විපක්ෂ නායක සජිත් ප්රේමදාස මහතා විසින් ඉදිරිපත් කර තිබේ. ජනාධිපති අනුර කුමාර දිසානායක මහතාගේ ප්රධානත්වයෙන් රැස්වූ ජාතික ආපදා කළමනාකරණ සභාව අමතමින් විපක්ෂ නායකවරයා අවධාරණය කළේ, දේශගුණික ආරක්ෂාව යනු දේශපාලන භේදවලින් තොරව විද්යාත්මක පදනමක් මත ඒකාබද්ධව මුහුණ දිය යුතු ජාතික ප්රමුඛතාවක් බවයි.
ගෝලීය විද්යාත්මක තක්සේරුවලට අනුව, මෙවර වර්ධනය වෙමින් පවතින එල් නිනෝ තත්ත්වය හේතුවෙන් දීර්ඝකාලීන නියඟයක් සහ ඉන් අනතුරුව දැඩි ගංවතුර තත්ත්වයන් ඇති විය හැකි බවට ඔහු අනතුරු ඇඟවීය. ආපදාවක් සිදු වූ පසු ඊට ප්රතිචාර දැක්වීමේ පැරණි ක්රමවේදයෙන් මිදී, විද්යාත්මක අනාවැකි සහ පූර්ව සූදානම මත පදනම් වූ “පූර්ව අපේක්ෂිත පාලන ආකෘතියක්” (Anticipatory Governance Model) රට තුළ ස්ථාපිත කළ යුතු බව සජිත් ප්රේමදාස මහතා පෙන්වා දුන්නේය.
විපක්ෂ නායකවරයා ඉදිරිපත් කළ ප්රධාන යෝජනා අතර, දේශගුණික ඔරොත්තු දීමේ වැඩපිළිවෙළ කෘෂිකර්ම, ජල සම්පත්, බලශක්ති සහ ආරක්ෂක ඇතුළු සියලුම අමාත්යාංශ ඒකාබද්ධ වූ සාමූහික රාජ්ය වගකීමක් බවට පත් කිරීම මූලික වේ. එමෙන්ම ජල සුරක්ෂිතතාව සඳහා ඒකාබද්ධ ජලාශ කළමනාකරණය, දේශගුණික විපර්යාසවලට ඔරොත්තු දෙන කෘෂිකාර්මික ක්රමවේද (Climate-Smart Agriculture) ව්යාප්ත කිරීම, නවීන පූර්ව අනතුරු ඇඟවීමේ පද්ධති ස්ථාපිත කිරීම සහ රජයට සාක්ෂි සහිතව තීන්දු තීරණ ගැනීම සඳහා සහය වන විශේෂ “ජාතික දේශගුණික අවදානම් සහ ආපදා බුද්ධි අංශයක්” (NCNDIC) පිහිටුවීමේ අවශ්යතාව ද ඔහු පෙන්වා දුන්නේය.
දිගුකාලීන ප්රතිපත්තිමය රාමුවක් වෙනුවෙන් “දේශගුණික ඔරොත්තු දීමේ හැකියාව සහ ආපදා සූදානම පිළිබඳ ජනාධිපති ධවල පත්රිකාවක්” (Presidential White Paper) සකස් කළ යුතු බව ද සජිත් ප්රේමදාස මහතා මෙහිදී යෝජනා කළේය. මෙම අභියෝගය රජයට පමණක් තනිවම ජයගත නොහැකි බැවින් පාර්ලිමේන්තුව, විශ්වවිද්යාල, පෞද්ගලික අංශය සහ සිවිල් සංවිධානවල දායකත්වය ඇතිව ශ්රී ලාංකිකයන්ගේ ජීවිත සහ ජීවනෝපායන් ආරක්ෂා කිරීම සැමගේ පොදු ජාතික වගකීමක් බව ඔහු වැඩිදුරටත් සඳහන් කළේය.
