ශ්රී ලංකාව සහ ඉන්දියාව අතර මාධ්ය ක්ෂේත්රයේ සහයෝගීතාව, වෘත්තීය සබඳතා සහ දැනුම් හුවමාරුව තවදුරටත් පුළුල් කිරීමේ අරමුණින් ශ්රී ලංකා–ඉන්දියානු මාධ්ය මිත්රත්ව සංගමය සංවිධානය කළ “SLIMFA මාධ්ය සම්මන්ත්රණය 2026” පසුගියදා සාර්ථකව පැවැත්විණි. මෙවර එහි දෙවන අදියර පැවැත්වුණේ “වෙනස්වන ලෝකයක අදාළත්වය රැකගැනීම” යන තේමාව යටතේය. මෙම අවස්ථාව සඳහා සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස සහ ජනමාධ්ය නියෝජ්ය අමාත්ය ආචාර්ය කෞෂල්යා ආරියරත්න යන මහත්ම මහත්මීන් ද එක්ව සිටියහ.
මෙහිදී අදහස් දැක්වූ ජනමාධ්ය අමාත්ය වෛද්ය නලින්ද ජයතිස්ස මහතා සඳහන් කළේ, ශ්රී ලංකා – ඉන්දියා මාධ්ය මිත්රත්ව සංගමය වසර දෙකක් වැනි කෙටි කාලයක් තුළ දෙරටේ මාධ්යවේදීන් වෙනුවෙන් වැදගත් වේදිකාවක් නිර්මාණය කර ඇති බවයි. කෘත්රිම බුද්ධිය (AI), ඩිජිටල් තාක්ෂණය සහ සමාජ මාධ්ය හේතුවෙන් ජනතාව තොරතුරු වැළඳගන්නා රටාව වේගයෙන් වෙනස් වන බව පෙන්වා දුන් අමාත්යවරයා, වත්මන් ප්රේක්ෂකයා පුවත් ලබාගන්නවාට අමතරව ඒවා විමර්ශනය හා සත්යාපනය කරන මට්ටමට පත්ව ඇති බව ප්රකාශ කළේය. වැරදි සහ නොමඟ යවන තොරතුරු ක්ෂණයකින් පැතිර යන මෙවන් වටපිටාවක වෘත්තීය මාධ්යකරණයේ වගකීම ඉහළ ගොස් ඇති බවත්, මාධ්ය ආයතනයක ප්රධානතම වත්කම වන්නේ ‘විශ්වසනීයත්වය’ බවත් ඔහු අවධාරණය කළේය.
මෙම සම්මන්ත්රණය සඳහා ශ්රී ලංකාවේ සහ ඉන්දියාවේ ප්රමුඛ පෙළේ මාධ්යවේදීන්, සංස්කාරකවරුන්, මාධ්ය ආයතන ප්රධානීන්, ඩිජිටල් මාධ්ය නිර්මාණකරුවන් මෙන්ම මාධ්ය අධ්යයන සිසුන් විශාල පිරිසක් සහභාගී වූහ. එහිදී කෘත්රිම බුද්ධිය, ඩිජිටල් පරිවර්තනය, ප්රේක්ෂක හැසිරීම්, මාධ්ය විශ්වසනීයත්වය සහ සත්ය තොරතුරු තහවුරු කිරීම වැනි කාලීන මාතෘකා රැසක් පිළිබඳව පුළුල් ලෙස අත්දැකීම් හුවමාරු කර ගැනීම සහ සංවාදයේ යෙදීම සිදු කෙරිණි.
