රාජ්ය අනුග්රහය සහිතව පැවැත්වීමට නියමිත ශ්රී ලංකා අමරපුර මහා නිකායේ උපසම්පදා විනය කර්ම මහෝත්සවයේ සංවිධාන කටයුතු පිළිබඳ සාකච්ඡාවක් අමරපුර මහා සංඝ සභාවේ මහා ලේඛකාධිකාරි පූජ්ය බලපිටියේ සිරිසීවලී නාහිමියන්ගේ සහ ජනාධිපති ලේකම් ආචාර්ය නන්දික සනත් කුමාරනායකගේ ප්රධානත්වයෙන් අද (18) පෙරවරුවේ ජනාධිපති කාර්යාලයේදී පැවැත්විණි.
මෙවර උපසම්පදා විනය කර්ම මහෝත්සවය සාමණේර හිමිවරුන් 400කට අධික පිරිසකගේ සහභාගීත්වයෙන් එළඹෙන ජූලි 09 වන දා සිට 22 වන දා දක්වා කළුතර කළු ගඟේ පිහිටි උදකුක්ඛේප සීමා මාලකයේදී පැවැත්වීමට නියමිතය. මෙහි රාජ්ය මහෝත්සවය ජනාධිපති අනුර කුමාර දිසානායකගේ සහභාගිත්වයෙන් ජූලි 09 වැනිදා සවස 3.00ට කළුතර බෝධිය අභියසදී පැවැත්වේ. සාමාන්යයෙන් වසර 3කට වරක් පැවැත්වෙන මෙම පුණ්යකර්මය මෙවර පැවැත්වෙන්නේ වසර 9කට පසුව වීම විශේෂත්වයකි.
ජනාධිපතිවරයා පසුගිය ජනවාරි 01 වැනිදා අමරපුර මහනිකායේ උත්තරීතර මහනායක අතිපූජ්ය කරගොඩ උයන්ගොඩ මෛත්රීමූර්ති මහනාහිමියන් බැහැදැකීමට ගිය අවස්ථාවේදී උන්වහන්සේ කළ ඉල්ලීමකට අනුව මෙම උත්සවය රාජ්ය අනුග්රහයෙන් සංවිධානය කෙරේ. ත්රිවිධ හමුදාව, පොලිසිය ඇතුළු රාජ්ය හා පෞද්ගලික ආයතන රැසක සහාය ඇතිව මෙහි කටයුතු සාර්ථක කරගැනීම පිළිබඳව මහා සංඝරත්නය, දේශපාලන අධිකාරිය සහ රාජ්ය නිලධාරීන්ගේ සහභාගීත්වයෙන් පැවැති මෙම සාකච්ඡාවේදී අවධානය යොමු කෙරිණි.
