තම ‘Truth Social’ සමාජ මාධ්ය ජාලය ඔස්සේ අදහස් දක්වමින් ජනාධිපති ට්රම්ප් සඳහන් කළේ, පසුගිය සතියේ සිට ක්රියාත්මක වන මෙම නාවික අවහිර කිරීම් හේතුවෙන් ඉරානය දැඩි පසුබෑමකට ලක්ව ඇති බවයි. ඇමෙරිකානු මධ්යම විධානය (Centcom) වාර්තා කරන පරිදි, මේ දක්වා නෞකා 27කට ඉරාන වරායන් වෙත ඇතුළු වීමට ඉඩ නොදී හරවා යවා ඇති අතර, පසුගිය ඉරිදා දිනයේදී ඉරාන ධජය සහිත භාණ්ඩ ප්රවාහන නෞකාවක් ද ප්රථම වරට ඇමෙරිකානු හමුදා භාරයට ගෙන තිබේ.
ඉරානය මෙම ක්රියාව “මුහුදු මංකොල්ලයක්” ලෙස හඳුන්වමින් හෙළා දකින අතර, තමන් ද හෝර්මුස් සමුද්ර සන්ධිය වසා තැබීමට කටයුතු කරන බව පවසයි. පසුගිය සෙනසුරාදා දින හෝර්මුස් සමුද්ර සන්ධිය කෙටි වේලාවකට විවෘත කළ ද, නෞකා ඉලක්ක කර ඉරානය ප්රහාර එල්ල කරන බවට එල්ල වූ චෝදනා හමුවේ එය යළිත් වසා දැමීමට සිදුවිය. ඇමෙරිකාව සිය වරාය අවහිර කිරීම් නතර කරන තෙක් මෙම මුහුදු මාර්ගය විවෘත නොකරන බව ඉරානයේ ස්ථාවරය වී තිබේ.
මේ අතර, පාකිස්තානයේ ඉස්ලාමාබාද් නුවර පැවැත්වීමට නියමිත දෙවන වටයේ සාම සාකච්ඡා සඳහා සූදානම් වීමේ ලකුණු පෙනෙන්නට තිබුණ ද, ඒ පිළිබඳ තවමත් පවතින්නේ අවිනිශ්චිතතාවයකි. ඇමෙරිකානු උප ජනාධිපති ජේ.ඩී. වෑන්ස් ඇතුළු නියෝජිත පිරිස අද (අඟහරුවාදා) දිනයේදී වොෂින්ටනයෙන් පිටත්වීමට නියමිත බව වාර්තා වේ. එහෙත්, තමන් සාකච්ඡාවලට සහභාගී වන්නේ ද යන්න පිළිබඳව ඉරානය මෙතෙක් නිල තීරණයක් ගෙන නොමැති අතර, ඉරාන විදේශ අමාත්යාංශ ප්රකාශකයා සඳහන් කළේ එවැනි සැලසුමක් තවමත් නොමැති බවයි.
කෙසේ වෙතත්, ඉස්ලාමාබාද් නුවර සෙරීනා හෝටලයේ ආරක්ෂාව තර කර ඇති අතර නියෝජිතයන්ගේ පැමිණීම අපේක්ෂාවෙන් ප්රධාන මාර්ග වසා දමා තිබේ. දෙපාර්ශ්වයම සාකච්ඡා මේසයට ගෙන්වා ගැනීමට පාකිස්තාන රජය දැඩි රාජ්යතාන්ත්රික උත්සාහයක නිරත වෙමින් සිටින අතර, ඇමෙරිකානු නියෝජිත පිරිස එහි පැමිණියහොත් ඉරානයට ද ඊට සහභාගී නොවී සිටීම අසීරු වනු ඇති බව දේශපාලන විශ්ලේෂකයෝ පෙන්වා දෙති.
