වියට්නාම ජනාධිපති ටෝ ලෑම් (To Lam) මහතා ලබන මැයි මස 08 වැනිදා ශ්රී ලංකා පාර්ලිමේන්තුව ඇමතීමට නියමිත බව පාර්ලිමේන්තු නිවේදනයක් උපුටා දක්වමින් වාර්තා වේ. කථානායක ජගත් වික්රමරත්න මහතාගේ ප්රධානත්වයෙන් පසුගියදා පැවැති පාර්ලිමේන්තු කටයුතු පිළිබඳ කාරක සභාවේදී මෙම තීරණය ගෙන ඇති අතර, ඒ අනුව මැයි මස 05 වැනිදා සිට 08 වැනිදා දක්වා පාර්ලිමේන්තු සභා වාර පැවැත්වීමට තීරණය කර ඇත.
මැයි මස 05 වැනි අඟහරුවාදා දින කොළඹ වරාය නගර ආර්ථික කොමිෂන් සභාව යටතේ වන නියෝග පිළිබඳ විවාද කිරීමට නියමිත අතර, මැයි 06 බදාදා දින ආයතනික සහ පුද්ගල පුනරුත්ථාපන සහ බංකොලොත්භාවය පිළිබඳ පනත් කෙටුම්පත දෙවන වර කියවීමේ විවාදය පැවැත්වේ. මැයි 07 බ්රහස්පතින්දා දින ජාතික ප්රවාහන කොමිෂන් සභා පනත, මෝටර් රථ ප්රවාහන පනත සහ ආගමන හා විගමන පනත යටතේ වන නියෝග මෙන්ම මහජන ආරක්ෂක ආඥාපනත සහ අත්යවශ්ය මහජන සේවා පනත යටතේ වන යෝජනා සම්මතයන් විවාදයට ගැනීමට නියමිතය.
සංචාරක වියට්නාම ජනාධිපතිවරයා මැයි 08 වැනි සිකුරාදා පෙරවරු 11.05 ට පමණ පාර්ලිමේන්තුවට පැමිණ සභාව ඇමතීමට නියමිතව ඇති අතර, ඉන් අනතුරුව පස්වරුවේදී පෞද්ගලික මන්ත්රී යෝජනා හතක් විවාදයට ගැනීමට නියමිතය. මෙම පෞද්ගලික මන්ත්රී යෝජනා අතර ක්රීඩක ක්රීඩිකාවන්ට අධ්යාපන අවස්ථා ලබාදීම, වෘත්තීය තාක්ෂණ විශ්වවිද්යාලය පිළිබඳ සිසුන් දැනුවත් කිරීම, සංක්රමණික සේවකයින්ගේ ගැටලු විසඳීම සඳහා ඒකකයක් පිහිටුවීම, පළාත් පාලන ආයතන පිළිබඳ මහජන අප්රසාදය වැළැක්වීම සහ පරිසර සංරක්ෂණය වැනි කරුණු ඇතුළත් වේ.
