නව අධ්යාපන ලේකම් ලෙස තිලකා ජයසුන්දර මහත්මිය පත් කර ඇති අතර ඊයේ (02) පෙරවරුවේ අධ්යාපන අමාත්යාංශයේ දී සිය ධුරයේ වැඩකටයුතු ආරම්භ කළා ය.
ශ්රී ලංකා පරිපාලන සේවයේ විශේෂ ශ්රේණියේ නිලධාරිනියක් වන තිලකා ජයසුන්දර මහත්මිය 2021 වර්ෂයේ දී රාජ්ය කාර්ය සාධනය හා කළමනාකරණය වෙනුවෙන් පොදුරාජ්ය මණ්ඩලීය විශිෂ්ටතා සම්මානලාභිණියකි. මීට පෙර ඇය කර්මාන්ත අමාත්යාංශයේ ලේකම් ලෙස කටයුතු කරමින් සිටි අතර යෞවන හා ක්රීඩා අමාත්යාංශයේ සහ සුළු අපනයන බෝග සංවර්ධන හා අපනයන ප්රවර්ධනය පිළිබඳ රාජ්ය අමාත්යාංශයේ අතිරේක ලේකම්වරියක් වශයෙන් ද, මුදල් අමාත්යාංශයේ රාජ්ය ව්යාපාර දෙපාර්තමේන්තුවේ අධ්යක්ෂ ජනරාල්වරිය ලෙස ද ඒ හා සමගාමී ව එම කාලපරිච්ඡේදය තුළ ස්වාධීන රූපවාහිනී ජාලයේ (ITN) ප්රථම කාන්තා සභාපතිනිය ලෙස ද කටයුතු කර ඇත. එමෙන් ම මුදල් හා ජනමාධ්ය අමාත්යාංශයේ සංවර්ධන හා සැලසුම් අංශයේ අතිරේක ලේකම්වරියක් ලෙස ද ඇය කටයුතු කර ඇත.
එමෙන් ම ජයසුන්දර මහත්මිය ජපානයේ ටෝකියෝහි ආසියානු ඵලදායිතා සංවිධානයේ හිටපු කර්මාන්ත අධ්යක්ෂවරියක් ලෙස කටයුතු කළ අතර, ආසියානු ඵලදායිතා සංවිධානයේ ශ්රී ලංකාවේ ප්රධානියා ලෙස ද ඇය වසර 10කට අධික කාලයක් පුරා කටයුතු කර තිබේ. වසර 56ක ඉතිහාසය තුළ එම සංවිධානයෙහි සිටි එකම කාන්තා නිලධාරිනිය වූයේ ද ඇයයි.
ශ්රී ජයවර්ධනපුර විශ්වවිද්යාලයෙන් විද්යාවේදී උපාධියක් (BSC) සහ ව්යාපාර කළමනාකරණපති උපාධියක් (MPA) ද ශ්රී ලංකා තොරතුරු තාක්ෂණ ආයතනයෙන් තොරතුරු තාක්ෂණ පශ්චාත් උපාධි ඩිප්ලෝමාවක් PGDIT (SLIIT) ද ලබා සිටින තිලකා ජයසුන්දර මහත්මිය ඵලදායිතා ප්රවර්ධන ක්ෂේත්රයේ මෙන් ම ව්යාපෘති කළමනාකරණය, රාජ්ය ප්රතිපත්ති, පරිපාලන, මානව සම්පත් කළමනාකරණය, සැලසුම් සහ අධීක්ෂණය, උපායමාර්ගික කළමනාකරණය, නායකත්වය, දැනුම කළමනාකරණය, හරිත ඵලදායිතාව, නවෝත්පාදනය සහ මානව කේන්ද්රගත ඵලදායිතාව ඇතුළු ක්ෂේත්ර රැසක අත්දැකීම් රැසක් ඇති නිලධාරිනියකි.
