වත්මන් ආණ්ඩුව විසින් ගෙන එන ලද ආර්ථික පරිවර්තන පනත් කෙටුම්පතට සහ රාජ්ය මූල්ය කලමනාකරණ පනත් කෙටුම්පතට එරෙහිව පෙත්සම් ගොනු කරමින් ඒවා ශ්රේෂ්ඨාධිකරණය ඉදිරියේ අභියෝගයට ලක් කිරීමට ”සර්වජන බලය” එකමුතුව ඊයේ (04) දින කටයුතු කළේය.
“සර්වජන බලය” එකමුතුවේ නායකත්ව මණ්ඩලය වෙනුවෙන් ජාතික නිදහස් පෙරමුණේ නායක විමල් වීරවංශ, පිවිතුරු හෙළ උරුමයේ නායක උදය ගම්මන්පිල, ‘යුතුකම’ ජාතික සංවිධානයේ සභාපති, ගෙවිඳු කුමාරතුංග, ස්වාධීන මන්ත්රී සංසදයේ චන්න ජයසුමන යන පාර්ලිමේන්තු මන්ත්රීවරුන් සහ ශ්රී ලංකාවේ කොමියුනිස්ට් පක්ෂයේ ප්රධාන ලේකම්, වෛද්ය ජී. වීරසිංහ, මව්බිම ජනතා පක්ෂයේ නායක, ව්යවසායක දිලිත් ජයවීර යන මහත්වරුන් විසින් මෙම පෙත්සම් ඉදිරිපත් කරනු ලැබීය. නීතිපතිවරයා වගඋත්තරකරු ලෙස නම් කරමින් ඉදිරිපත් කරන ලද මෙම පෙත්සම් මගින් “සර්වජන බලය” එකමුතුවේ නායකත්ව මණ්ඩලය, යෝජිත පනත් කෙටුම්පත් තුළින් පාර්ලිමේන්තුව සතු රාජ්ය මූල්ය බලය ජනාධිපතිවරයා යටතට පත් වන බව පෙන්වා දෙයි.
ඒ අනුව “සර්වජන බලය” එකමුතුව ශ්රේෂ්ඨාධිකරණයෙන් ඉල්ලා සිටියේ අදාළ පනත් කෙටුම්පත් සම්මත කිරීමට අවශ්ය නම් පාර්ලිමේන්තුවේ තුනෙන් දෙකක බහුතර ඡන්දයකින් ඒවා අනුමත වී ජනමතවිචාරණයකින් ද අනුමත විය යුතු බවට තීන්දුවක් ලබා දෙන ලෙසයි.
මෙහිදී පෙත්සම්කාර “සර්වජන බලය එකමුතුව” වෙනුවෙන් ජ්යෙෂ්ඨ නීතිඥ කනිෂ්ක විතාන මහතාගේ මෙහෙයවීම මත නීතිඥ සවනි රාජකරුණා මහත්මිය පෙනී සිටියාය.
ජාතික නිදහස් පෙරමුණේ නායක විමල් වීරවංශ, පිවිතුරු හෙළ උරුමයේ නායක උදය ගම්මන්පිල, යුතුකම’ ජාතික සංවිධානයේ සභාපති ගෙවිඳු කුමාරතුංග, ජාතික නිදහස් පෙරමුණේ ජාතික සංවිධායක ජයන්ත සමරවීර යන පාර්ලිමේන්තු මන්ත්රීවරු සහ නැගෙනහිර පළාත් හිටපු ආණ්ඩුකාර අනුරාධා යහම්පත් මහත්මිය ඇතුළු “සර්වජන බලය” එකමුතුවේ නායකයෝ පිරිසක් මෙම අවස්ථාවට සහභාගී වූහ.
