දෙවන ලෝක යුද්ධයෙන් පසු දශක කිහිපයක් පුරා ක්රියාත්මක වූ දැඩි සාමකාමී ආරක්ෂක ප්රතිපත්තිවලින් ඔබ්බට යමින්, සිය ආරක්ෂක අපනයන නීති රීතිවල දැවැන්ත සංශෝධනයක් සිදු කිරීමට ජපානය අද (අප්රේල් 21) පියවර ගෙන තිබේ. මේ අනුව යුද නැව්, මිසයිල සහ අනෙකුත් අවි ආයුධ විදේශයන්ට අලෙවි කිරීම සඳහා ජපාන රජය නිල වශයෙන් දොරටු විවෘත කර ඇත. අග්රාමාත්ය සානේ ටකයිචිගේ (Sanae Takaichi) රජය විසින් අනුමත කරන ලද මෙම නව වෙනස්කම් හරහා මීට පෙර පැවති අපනයන සීමාවන් සම්පූර්ණයෙන්ම ඉවත් කර තිබේ.
මීට පෙර ජපානයට අපනයනය කිරීමට අවසර තිබුණේ සහන සේවා, ප්රවාහන, නිරීක්ෂණ සහ බිම් බෝම්බ ඉවත් කිරීමේ උපකරණ වැනි සීමිත කාණ්ඩ පහක ද්රව්ය පමණි. එහෙත් නව ප්රතිසංස්කරණ යටතේ එම සීමා ඉවත් කර ඇති අතර, දැන් යුද නැව් සහ මිසයිල වැනි ප්රහාරක අවි පවා අපනයනය කිරීමට මඟ පෑදී ඇත. යුක්රේනයේ සහ මැදපෙරදිග පවතින යුදමය වාතාවරණය හේතුවෙන් ඇමෙරිකානු අවි නිෂ්පාදනයට දැඩි පීඩනයක් එල්ල වී ඇති පසුබිමක, පෝලන්තය සහ පිලිපීනය වැනි රටවල් ජපාන අවි ලබා ගැනීමට දැඩි උනන්දුවක් දක්වයි. මෙහි පළමු පියවර ලෙස පිලිපීනයට භාවිත කළ යුද නැව් අපනයනය කිරීමට ජපානය දැනටමත් සූදානම් වෙමින් සිටී.
ජපානය මෙම පියවර ගෙන ඇත්තේ සිය ආරක්ෂක කර්මාන්ත පදනම ශක්තිමත් කර ගැනීම සඳහාය. නිෂ්පාදන ධාරිතාව ඉහළ නැංවීම මගින් එක් ඒකකයක් සඳහා යන පිරිවැය අඩු කර ගැනීමටත්, හදිසි මිලිටරි අර්බුදයකදී භාවිත කළ හැකි නිෂ්පාදන පහසුකම් පුළුල් කර ගැනීමටත් ජපානය අපේක්ෂා කරයි. මීට අමතරව, බ්රිතාන්යය සහ ඉතාලිය සමඟ එක්ව මීළඟ පරම්පරාවේ ප්රහාරක ගුවන් යානයක් නිපදවීමට ද ජපානය දැනටමත් කටයුතු කරමින් සිටී. ජපානය පවසන්නේ අසල්වැසි චීනයෙන් එල්ල විය හැකි තර්ජන හමුවේ සිය හමුදාව ශක්තිමත් කිරීම අත්යවශ්ය බවයි. එබැවින් මිසයිල, ස්ටෙල්ත් ජෙට් යානා සහ ඩ්රෝන යානා මිලදී ගැනීමට ද ඔවුන් පියවර ගනිමින් සිටී.
කෙසේ වෙතත්, ගැටුම් පවතින රටවලට අවි අලෙවි නොකිරීමේ මූලධර්මය ජපානය තවදුරටත් රකිනු ඇත. නමුත් ජාතික ආරක්ෂාවට අත්යවශ්ය යැයි හැඟෙන අවස්ථාවලදී ඊට ව්යතිරේකයන් (Exceptions) ඉදිරිපත් කළ හැකි බව රජය අවධාරණය කරයි. ජපානය සිය ආරක්ෂක වියදම් දැනටමත් දළ දේශීය නිෂ්පාදිතයෙන් (GDP) 2% දක්වා වැඩි කර ඇති අතර ඉදිරියේදී එය තවදුරටත් ඉහළ යනු ඇතැයි අපේක්ෂා කෙරේ.
