ඔස්ට්රේලියාවට ගෙවීමට තිබූ ඇමෙරිකානු ඩොලර් ලක්ෂ 25ක (මිලියන 2.5ක) මුදලක් හැකර් ප්රහාරයකින් අහිමි වීම සම්බන්ධයෙන් රජය දැඩි විවේචනයට ලක් කරමින් විපක්ෂ නායක සජිත් ප්රේමදාස මහතා අද (අප්රේල් 23) විශේෂ ප්රකාශයක් සිදු කළේය.
මෙම සයිබර් සොරකම පසුගිය ජනවාරි මාසයේදී සිදුව තිබියදී, ඒ පිළිබඳව ඊයේ දින තොරතුරු අනාවරණය වන තෙක් රජය සහ මුදල් අමාත්යාංශය එය පාර්ලිමේන්තුවෙන් සහ මහජනතාවගෙන් රහසක් ලෙස තබාගත්තේ ඇයිද යන්න ඔහු ප්රශ්න කළේය. මූල්ය වගකීම පාර්ලිමේන්තුව සතු වුවද, මාස 4-5ක් පුරා මෙම තොරතුරු සඟවා තැබීම බරපතල ගැටලුවක් බව ඔහු පෙන්වා දුන්නේය.
සිද්ධිය සම්බන්ධයෙන් මාර්තු මාසයේදී පත් කළ තාක්ෂණික පරීක්ෂණ කමිටුවේ විනිවිදභාවය පිළිබඳව විපක්ෂ නායකවරයා සැක පළ කළේය. විශේෂයෙන්ම, මෙවැනි මහා පරිමාණ මූල්ය අහිමිවීමක් සිදුවූ ආයතනයේම නිලධාරීන් පරීක්ෂණ කමිටුවට පත් කිරීමෙන් සාධාරණ පරීක්ෂණයක් අපේක්ෂා කළ නොහැකි බවත්, මේ සඳහා ස්වාධීන පරීක්ෂණයක් අවශ්ය බවත් ඔහු අවධාරණය කළේය.
විදේශ ණය පියවීමේදී අනුගමනය කළ යුතු සයිබර් ආරක්ෂණ ක්රමවේද (Registered White Listed Email, Call Verification ආදිය) නිසි ලෙස ක්රියාත්මක නොකිරීම පිළිබඳව ඔහු චෝදනා කළේය. ආරක්ෂිත ක්රමවේද අනුගමනය කරන ලෙස මහ බැංකුව අවස්ථා කිහිපයකදී ණය කළමනාකරණ ආයතනයට අනතුරු අඟවා තිබියදී පවා ඒවා නොසලකා හැරීම තුළින් රජයේ නොහැකියාව පෙන්නුම් කරන බව ඔහු පැවසීය.
“ඇවිදින පුස්තකාල” මෙන් දැනුම ඇති බව පවසා බලයට පැමිණි වත්මන් රජයට රටේ මූල්ය සුරක්ෂිතතාව තහවුරු කිරීමට නොහැකි වී ඇති බව පැවසූ සජිත් ප්රේමදාස මහතා, මෙම අහිමි වූ මුදලට වන්දි ගෙවිය යුත්තේ මහජනතාවගේ බදු මුදලින්ද යන්න ප්රශ්න කළේය. රටේ මූල්ය පද්ධතියේ පවතින සයිබර් අනාරක්ෂිතභාවය පිළිබඳව රජය වහාම පිළිතුරු දිය යුතු බව ද හෙතෙම වැඩිදුරටත් කියා සිටියේය.
