ගමේ තාරුණ්යයට සවියක් වෙමින් තරුණ ජවයේ තෝතැන්න වූ යොවුන් පුර 2019 සමාරම්භක උළෙල ඊයේ (27) වීරවිල පශු සම්පත් භූමි පරිශ්රයේදී අති උත්කර්ෂවත් ලෙස ආරම්භ කෙරිණි.
මේ සඳහා දිවයිනේ විවිධ ප්රදේශ නියෝජනය කරමින් යෞවන සමාජ සාමාජික සාමාජිකාවන්, විදේශීය තරුණ තරුණියන්, බාලදක්ෂියින්, ශිෂ්යභට කණ්ඩායම්, යෞවන තිළිණලාභීන් සහ අපේෂකයින් මෙන්ම කොතලාවල ආරක්ෂක විශ්වවිද්යාලයේ උපාධි අපේෂකයින්, යොවුන් සේනාංක, ශිෂ්ය පාර්ලිමේන්තුව, වෘත්තීය පුහුණුලාභීන් ඇතුළු 8000 කට අධික තරුණ තරුණියන් පිරිසකගේ සහභාගීත්වයෙන් හා වරාය හා දක්ෂිණ සංවර්ධන අමාත්ය සාගර රත්නායක මහතාගේ ප්රධානත්වයෙන් පැවැත්විණි. වත්මන් රජය අනාගත ජවයට නව ජීවයක් එක් කිරීමට හැම විටම ක්රියා කළ බවත් අමාත්ය සාගර රත්නායක මහතා සමාරම්භක උලෙළ අමතමින් පැවසිය.
යොවුන් පාර්ලිමේන්තුව ඇති කරමින්, තරුණ සම්මේලන පවත්වමින් ජාත්යන්තරය පවා ජය ගත හැකි තරුණ පරපුරක් බිහි කිරීම අපේක්ෂා බවත් ධීවර හා ජලජ සම්පත් රාජ්ය අමාත්ය දිලීප් වෙදආරච්චි මහතා කියා සිටියේය.
ව්යවසාය සංවර්ධනයෙන්, ලෝකයේ තිබෙන නව තාක්ෂණයෙන් පරිපූර්ණ පිරිපුන් පරපුරක් බිහි කිරීම ජාතික තරුණ සේවා සභාව පවතින තාක්කල් සිදු කරන බවත් දැඩි උද්යෝගයෙන් යුතුව ජාතික තරුණ සේවා සභාවේ සභාපති නීතිඥ එරන්දික වැලිඅංගේ මහතා පැවසිය.
බැහැරගත ක්රියාකාරකම්, මිශ්ර වොලිබෝල් තරග, දුනුවිදීමේ පුහුණු වැඩසටහන්, මිනි මැරතන් තරග, විනෝද ක්රීඩා මෙන්ම යොවුන් ගායන ශිල්පී තරග, නිර්මාණාත්මක නර්තන රසවින්දන වැඩසටහන්, ශ්රමාදාන හා රුක්රෝපණ, රැකියා වෙළඳ පොළ, අධ්යාපන හා වෙළඳ ප්රදර්ශන, වෘත්තීය මාර්ගෝපදේශ වැඩසටහන් ද මාධ්ය කලාප හා මාධ්ය වැඩමුළු, වීදි නාට්ය තරග සහ ගිණිමැල සංදර්ශන යනාදී වැඩසටහන් රැසක් මෙම ක්රියාත්මක කිරීමට නියමිතය
මීට අමතරව ජාතික තරුණ සේවා සභාවේ විචිත්රවත් නර්තනාංගවලින් ද මෙම අවස්ථාව සමන්විත වූ අතර දකුණු පළාත් සභා විපක්ෂ නායක එස්.තෙන්නකෝන් නිලමේ මහතා ඇතුලු සම්භාවනීය අමුත්තන් රැසක්ද සහභාගි විය.
