ශ්රී ලංකාවට අයත් සුවිශේෂී ආර්ථික කලාපය (EEZ) තුළ රැඳී සිටි ‘ෂී යැන් 6’ (Shi Yan 6) නම් චීන පර්යේෂණ නෞකාවේ සිටි රෝගී වූ නාවිකයෙකු ගොඩබිමට රැගෙන ඒමට ශ්රී ලංකා නාවික හමුදාව පියවර ගෙන ඇති නමුත්, අදාළ නෞකාවට මෙරට මුහුදු සීමාවට ඇතුළු වීමට අවසර ලබා නොදෙන බව රජය අවධාරණය කරයි. ශ්රී ලංකාවේ සිට නාවික සැතපුම් 700ක් පමණ දුරින් පිහිටි ජාත්යන්තර මුහුදු සීමාවේ රැඳී සිටි මෙම නෞකාවේ සිටි නාවිකයෙකු දැඩි වකුගඩු ආබාධයකින් පීඩා විඳීම හේතුවෙන් නිකුත් කළ හදිසි ආපදා සංඥාවකට අනුව මෙම සහන සැලසීම සිදු විය. නාවික හමුදාව විසින් රෝගියා ගොඩබිමට රැගෙන විත් ප්රථමයෙන් ගාල්ල කරාපිටිය ශික්ෂණ රෝහලට ඇතුළත් කළ අතර, පසුව වැඩිදුර ප්රතිකාර සඳහා ඔහු කොළඹ ජාතික රෝහල වෙත මාරු කර යවා තිබේ.
විදේශීය පර්යේෂණ නෞකා මෙරටට පැමිණීම සම්බන්ධයෙන් 2024 දෙසැම්බර් මාසයේ සිට පනවා ඇති තාවකාලික තහනම තවදුරටත් ක්රියාත්මක වන බැවින්, මෙම නෞකාවට මෙරටට ඇතුළු වීමට අවසර හිමි නොවේ. රජයේ ආරංචි මාර්ග සඳහන් කරන්නේ අදාළ නෞකාව මෙරටට ඇතුළු වීම සඳහා කිසිදු නිල ඉල්ලීමක් ද ඉදිරිපත් කර නොමැති බවයි. කෙසේ වෙතත්, පසුගිය සතියේදී එක්සත් ජාතීන්ගේ ආහාර හා කෘෂිකර්ම සංවිධානය (FAO) යටතේ ක්රියාත්මක වන ‘ඩොක්ටර් ෆ්රිඩ්ජොෆ් නැන්සන්’ නෞකාවට පර්යේෂණ සඳහා විශේෂ අවසරයක් ලබා දුන්නේ එය ජාත්යන්තර සංවිධානයකට අයත් වීම පදනම් කරගනිමිනි. විදේශීය පර්යේෂණ නෞකා සම්බන්ධයෙන් අනුගමනය කළ යුතු නව සම්මත මෙහෙයුම් පටිපාටිය (SOP) සකස් කිරීමේ කටයුතු ද මේ වන විට රජය විසින් අවසන් අදියරට ගෙන ඇත.
