ස්පාඤ්ඤයේ ටොලේඩෝ (Toledo) පළාතේදී සිදු වූ දරුණු දුම්රිය අනතුරකින් පුද්ගලයන් 50 දෙනෙකුට අධික සංඛ්‍යාවක් ජීවිතක්ෂයට පත්ව ඇතැයි එරට ප්‍රාදේශීය මාධ්‍ය වාර්තා කරයි. මැඩ්රිඩ් අගනුවර සිට සෙවිල් දක්වා ධාවනය වූ අධිවේගී දුම්රිය දෙකක් එකිනෙක ගැටීමෙන් මෙම ඛේදවාචකය සිදුව ඇති අතර, අනතුරින් තුවාල ලැබූ පිරිස අතර බරපතළ තත්ත්වයේ පසුවන්නන් සිටීම හේතුවෙන් මියගිය සංඛ්‍යාව තවදුරටත් ඉහළ යා හැකි බව බලධාරීහු පවසති. මෙම හදිසි අනතුරත් සමඟ මැඩ්රිඩ් සහ ඇන්ඩලූසියාව අතර ධාවනය වූ අධිවේගී දුම්රිය මාර්ගයේ ගමනාගමන කටයුතු සම්පූර්ණයෙන්ම අත්හිටුවීමට දුම්රිය යටිතල පහසුකම් කළමනාකරණ ආයතනය පියවර ගෙන ඇත.
මෙම වසර තුළ ස්පාඤ්ඤයෙන් වාර්තා වන තෙවැනි විශාලතම දුම්රිය ඛේදවාචකය මෙය වන අතර, පසුගිය ජනවාරි මාසයේදී ද දකුණු කෝඩෝබා පළාතේ අඩාමුස් අසලදී සිදු වූ අධිවේගී දුම්රිය ගැටුමකින් පුද්ගලයන් 40 දෙනෙකුට වැඩි පිරිසක් මියගියහ. එයින් දින කිහිපයකට පසු බාර්සිලෝනා නගරය අසලදී ද තවත් දුම්රියක් පථයෙන් හැරී යාමේ අනතුරක් වාර්තා විය. වත්මන් සිදුවීම බරපතළ තත්ත්වයක් ලෙස හඳුන්වා දී ඇති එරට අග්‍රාමාත්‍යවරයා, අවශ්‍ය සියලුම මුදාගැනීමේ සහ සහන සේවා කඩිනමින් ක්‍රියාත්මක කරන ලෙස උපදෙස් දී ඇති අතර, මේ වන විටත් අනතුරට පත් ප්‍රදේශයේ දැවැන්ත මෙහෙයුම් ක්‍රියාත්මක වේ.
