මැදපෙරදිග කලාපය දැඩි යුදමය උණුසුමකට මුහුණ දී සිටින පසුබිමක, ඇමරිකානු මැරීන් භටයින් (US Marines) වැඩි පිරිසක් කලාපයට ළඟා වීමත් සමඟ ඉරාන සන්නද්ධ හමුදා සුවිශේෂී ප්රකාශයක් නිකුත් කර තිබේ. ඉරාන ආරක්ෂක අංශ ප්රකාශ කරන්නේ ඕනෑම ආකාරයක ඇමරිකානු පාබල හමුදා ආක්රමණයකට හෝ ගොඩබිම් මෙහෙයුමකට ප්රතිප්රහාර එල්ල කිරීම සඳහා තම සේනාංක ‘සෝදිසියෙන් සහ සූදානමින්’ පසුවන බවයි. බටහිර ආසියානු කලාපයේ පවතින මෙම අස්ථාවරත්වය හමුවේ ඇමරිකාව සිය යුද ශක්තිය වර්ධනය කිරීම, තවදුරටත් ගැටුම් උග්ර කිරීමට හේතුවක් වනු ඇති බවට ඉරානය අනතුරු අඟවයි.
පසුගිය පෙබරවාරි මාසයේ සිට ඇරඹුණු මෙම ගැටුම්කාරී වාතාවරණය පස්වැනි සතියටත් එළඹෙමින් තිබියදී, දෙපාර්ශවයම සිය දේශසීමා සහ උපායමාර්ගික මධ්යස්ථානවල ආරක්ෂාව තර කර ඇත. ඉරානය පෙන්වා දෙන්නේ තම රටට එරෙහිව එල්ල වන ඕනෑම තර්ජනයක් පරාජය කිරීමට අවශ්ය මිසයිල පද්ධති සහ ඩ්රෝන තාක්ෂණය තමන් සතුව පවතින බවයි. මේ අතර, ඇමරිකානු හමුදා ප්රධානීන් පවසන්නේ කලාපයේ සිටින තම මිත්ර රටවල සහ ඇමරිකානු වැසියන්ගේ ආරක්ෂාව තහවුරු කිරීම සඳහා මෙම අතිරේක භට පිරිස් යෙදවීම අත්යවශ්ය පියවරක් බවයි.
ගෝලීය වශයෙන් ඉන්ධන මිල ඉහළ යාමට සහ සැපයුම් දාමයන් අඩාල වීමට මෙම තත්ත්වය සෘජුවම බලපා ඇති අතර, ඉරානය සහ ඇමරිකාව අතර සෘජු ගැටුමක් ඇති වුවහොත් එය මුළුමනින්ම ලෝක ආර්ථිකය අඩාල කිරීමට සමත් වනු ඇතැයි දේශපාලන විශ්ලේෂකයෝ බිය පළ කරති. දැනටමත් හුති සටන්කාමීන් සහ අනෙකුත් සන්නද්ධ කණ්ඩායම් හරහා වක්ර යුද්ධයක (Proxy War) නිරතව සිටින ඉරානය, සෘජු ගොඩබිම් සටනකට සූදානම් බව පැවසීම ජාත්යන්තර ප්රජාවගේ දැඩි අවධානයට ලක්ව තිබේ.
