පකිස්ථාන සුපිරි ලීග් (PSL) තරගාවලියේ කරච්චි කින්ග්ස් කණ්ඩායම සමඟ පැවැති තරගයේදී පන්දුව පළුදු කිරීමේ චෝදනාව මත ලාහෝර් කලැන්ඩර්ස් කණ්ඩායමට දඬුවම් පමුණුවා තිබේ. තරගයේ තීරණාත්මක අවසාන පන්දු වාරයට පෙර කරච්චි කින්ග්ස් කණ්ඩායමට දඬුවම් ලකුණු 5ක් පිරිනැමීමට විනිසුරුවන් පියවර ගත්තේ පකිස්ථාන ජාතික කණ්ඩායමේ ක්රීඩක ෆකාර් සමාන් විසින් පන්දුවේ ස්වභාවය අයුතු ලෙස වෙනස් කර ඇති බවට නිගමනය කරමිනි.
තරගයේ ජයග්රහණය සඳහා අවසන් පන්දු වාරයේදී ලකුණු 14ක් අවශ්යව තිබූ කරච්චි කින්ග්ස් කණ්ඩායමට මෙම දඬුවම් ලකුණු හේතුවෙන් ජයග්රාහී ඉලක්කය ලකුණු 9ක් දක්වා පහත වැටුණි. අවසානයේදී ඔවුන් පන්දු 3ක් ඉතිරිව තිබියදී කඩුලු 4ක ජයග්රහණයක් වාර්තා කිරීමට සමත් විය. කෙසේ වෙතත් 35 හැවිරිදි ෆකාර් සමාන් තමන් පන්දුව පළුදු කළ බවට එල්ල වන චෝදනාව තරයේ ප්රතික්ෂේප කර ඇති අතර ඒ පිළිබඳ විනය පරීක්ෂණය හෙට (සඳුදා) දක්වා කල් තබා ඇත.
ක්රිකට් නීති පද්ධතියේ 41.3.2 වගන්තියට අනුව පන්දුව පිරිසිදු කිරීම හැර එහි ස්වභාවය වෙනස් කිරීම බරපතළ වරදකි. මෙම සිදුවීම පිළිබඳව ලාහෝර් කණ්ඩායමේ නායක සහීන් අෆ්රිඩි පවසා සිටියේ තමන් ඒ පිළිබඳව මෙතෙක් නිවැරදිව නොදන්නා බවත් රූපවාහිනී දර්ශන පරීක්ෂා කර බලා ඉදිරි පියවර ගන්නා බවත්ය. 2018 වසරේදී මෙවැනිම පන්දු පළුදු කිරීමේ සිදුවීමක් නිසා තහනමකට ලක්වූ ඩේවිඩ් වෝනර් මෙවර කරච්චි කණ්ඩායමේ නායකත්වය දැරීම ද විශේෂත්වයකි.
