ඉරානය සමඟ පවතින යුදමය වාතාවරණය හේතුවෙන් ජෙරුසලමේ පැරණි නගරයේ පිහිටි සියලුම ආගමික සිද්ධස්ථාන වන්දනාකරුවන් සඳහා වසා දැමීමට ඊශ්රායල බලධාරීන් පියවර ගෙන තිබුණද, එළඹෙන පාස්කු සමය (Easter) වෙනුවෙන් ක්රිස්තියානි බැතිමතුන්ට දේවස්ථාන වෙත පිවිසීමට අවසර ලබාදීමට ඊශ්රායල රජය තීරණය කර තිබේ. පසුගිය පාම් ඉරිදා (Palm Sunday) දින ‘ශුද්ධ වූ සෙපල්චර්’ දේවස්ථානයේ (Church of the Holy Sepulchre) දිව්ය පූජාව පැවැත්වීමට පැමිණි ලතින් කුලදෙටු හිමිපාණන්ව (Latin Patriarch) ආරක්ෂක හේතු මත පොලිසිය විසින් හරවා යැවීමත් සමඟ ඇති වූ ජාත්යන්තර විවේචන හමුවේ මෙම තීරණය ගෙන ඇත.
යුරෝපා සංගමයේ ඉහළ පෙළේ රාජ්ය තාන්ත්රික නිලධාරිනී කාජා කලාස් (Kaja Kallas) සහ ඇමරිකානු තානාපති මයික් හකබි (Mike Huckabee) යන මහත්ම මහත්මීන් විසින් ඊශ්රායලයේ මෙම ක්රියාව දැඩි ලෙස විවේචනය කරමින් එය ආගමික නිදහස උල්ලංඝනය කිරීමක් බව පෙන්වා දුන්හ. මීට ප්රතිචාර දක්වමින් අග්රාමාත්ය බෙන්ජමින් නෙතන්යාහුගේ කාර්යාලය ප්රකාශ කර ඇත්තේ, කිසිදු අනිසි චේතනාවක් එහි නොතිබූ බවත්, උන්වහන්සේගේ ආරක්ෂාව පිළිබඳ සැලකිලිමත් වූ බවත්ය.
කෙසේ වෙතත්, ක්රිස්තියානි බැතිමතුන් ජේසුස් වහන්සේ කුරුසියේ ඇණ ගැසූ ස්ථානය ලෙස විශ්වාස කරන මෙම ඓතිහාසික දේවස්ථානයේ වන්දනා කටයුතු සිදු කිරීම සඳහා විශේෂ ආරක්ෂක සැලැස්මක් මේ වන විට සකස් කරමින් පවතින බව ඊශ්රායල ආරක්ෂක අංශ තහවුරු කර තිබේ. යුදමය වාතාවරණය මධ්යයේ වුවද සියලුම ආගමිකයින්ට තම ශුද්ධ වූ ස්ථාන වෙත පිවිසීමේ අයිතිය තහවුරු කරන ලෙස ජාත්යන්තර ප්රජාව ඊශ්රායලයෙන් ඉල්ලා සිටියි.
